އަނބުރާ ދައުލަތަށް ހޯދަން އެންޓި ކޮރަޕްޝަން ކޮމިޝަން (އޭސީސީ) އިން އެންގި 50،370،521 ރުފިޔާގެ ތެރެއިން، މިހާތަނަށް ހޯދުނީ 234,531 ރުފިޔާ ކަމަށް އެ ކޮމިޝަނުން ބުނެފި އެވެ.

އޭސީސީން އާންމުކުރި މިދިޔަ އަހަރުގެ އަހަރީ ރިޕޯޓުގައިވާ ގޮތުން ސަރުކާރު ހިއްސާވާ ކުންފުނިތަކުން، ދައުލަތަށް އަނބުރާ 50،342،542 ރުފޮޔާ ހޯދަން މިދިޔަ އަހަރު އެންގި އެވެ. އެކަމަކު، އޭގެ ތެރެއިން ހޯދިފައިވަނީ 181،352 ރުފިޔާ އެވެ. ދެ ވަނައަށް އެންމެ ގިނަ ފައިސާ ހޯދާފައި ވަނީ އެޑިއުކޭޝަން މިނިސްޓްރީންނެވެ. އެއީ 29،120 ރުފިޔާ އެވެ. ރަށު ކައުންސިލްތަކުން ވެސް 13،559 ރުފިޔާ އަނބުރާ ހޯދާފައިވެ އެވެ.

އޭސީސީގެ މިދިޔަ އަހަރުގެ އަހަރީ ރިޕޯޓުގައިވާ ގޮތުން އެކޮމިޝަނަށް ޖުމްލަ 1151 ޝަކުވާ ހުށަހެޅި އެވެ. އަދި ޖުމްލަ 742 މައްސަލަ ކޮމިޝަނުގައި ރަޖިސްޓަރީކޮށްފައިވެ އެވެ. އެހެންކަމުން، އެކޮމިޝަނުގައި ރަޖިސްޓަރީކުރި މައްސަލަތަކުގެ އަދަދު 2022 ވަނަ އަހަރާ އަޅާ ބަލާއިރު 2023 ވަނަ އަހަރު 53 އިންސައްތަ ވަނީ އިތުރުވެފަ އެވެ.

މިދިޔަ އަހަރު އެންމެ ގިނައިން ހުށަހަޅާފައި ވަނީ ސަރުކާރު ހިއްސާވާ ކުންފުނިތަކާއި މުއައްސަސާތަކަށް ރައްދުވާ މައްސަލަތަކެވެ. އެ ތަންތަނަށް 209 މައްސަލަ ހުށަހެޅި އެވެ. ދެ ވަނައަށް އެންމެ ގިނައިން ހުށަހަޅާފައިވަނީ ނޭޝަނަލް ޕްލޭނިން ހައުސިން އެންޑް އިންފްރަކްސްޓްރަކްޗާއާ ގުޅޭ މައްސަލަތަކެވެ. އެ މިނިސްޓްރީއާ ގުޅޭގޮތުން 190 މައްސަލައެއް ހުށަހެޅި އެވެ.

އޭސީސީން 15 މައްސަލައަކާ ގުޅިގެން ދައުލަތަށް އަނބުރާ ލިބެންޖެހޭ 74.2 މިލިއަން ރުފިޔާ މިއަހަރު ހޯދުމަށް ނިންމާފައިވެ އެވެ. މީގެ ތެރެއިން 50.3 މިލިއަން ރުފިޔާ ދައުލަތަށް އަނބުރާ ހޯދުމަށް އިދާރާތަކުގައި އެދިފައިވާ ކަމަށް ރިޕޯޓްގައި ބުނެފައިވެ އެވެ.

މިދިޔަ އަހަރު ވެސް ކޮމިޝަނުން ނިންމި ތަހުގީގުތަކާ ގުޅިގެން އެންގުންތައް އަންގާފައިވެ އެވެ. އެގޮތުން، ޕްރިލިމިނަރީ ތަހުގީގު މަރުހަލާގައި 17 އެންގުމަކާއި ތަހުގީގު މަރުހަލާގައި 22 އެންގުމެއް އަންގާފައިވެ އެވެ. އަދި ކޮމިޝަނުން އަންގާ އެންގުންތަކަށް އިދާރާތަކުން އަމަލުކުރާ މިންވަރު މޮނިޓަރކުރުމުގެ ގޮތުން 74 މައްސަލައަކާ ގުޅޭ ގޮތުން 96 ފޮލޯއަޕް ހަދާފައިވެ އެވެ.