ރާއްޖޭގެ ކަނޑުގެ ސަރަހައްދުން ވަގަށް މަސްވެރިކަން ކޮށްގެން މިދިޔަ އަހަރު ހިފެހެއްޓި އިންޑިއާ ބޯޓަކަށް ކުރި 4.2 މިލިއަން ރުފިޔާގެ ޖޫރިމަނާ ސަރުކާރުން މާފުކޮށްދީފި އެވެ.

އިންޑިއާގެ "ހޮލީ ސްޕިރިޓް" މަސްބޯޓު އެމްއެންޑީއެފުން ހިފެހެއްޓީ މިދިޔަ އޮކްޓޯބަރު މަހުގެ 23ގަ އެވެ. އެ މައްސަލަ ބެލުމަށް ފަހު އެބޯޓު ޖޫރިމަނާ ކުރީ މިދިޔަ އަހަރުގެ އޮކްޓޯބަރު މަހު އެވެ.

އެ މައްސަލައިގައި ފައިސާ ހޯދަން ފިޝަރީޒް މިނިސްޓްރީން އޮތީ ސިވިލް ކޯޓުގައި ދައުވާއެއް ވެސް އުފުލައިފަ އެވެ. ނަމަވެސް ރައީސް އޮފީހުން އެ ޖޫރިމަނާ މައާފުކޮށް ބޯޓު ފުރުވާލުމުން، ދައުވާ އަނބުރާ ގެންދިޔުމަށް މިނިސްޓްރީން ކޯޓުގައި އެދުނެވެ. ކޯޓުން ވަނީ އެދުނު ގޮތަށް އެ ދައުވާ ކޯޓުން ބޭރުކޮށްލައިފަ އެވެ.

މި މައްސަލާގައި ސިވިލް ކޯޓުން ނިންމި ނިންމުމުން އެނގޭ ގޮތުގައި އެންތަނީ ޖަޔަބަލަންގެ މައްޗަށް ފިޝަރީޒް މިނިސްޓްރީން ކޮށްފައިވާ 4.2 މިލިއަން ރުފިޔާގެ ޖޫރިމަނާ ރައީސް އޮފީހުން މާފުކޮށްދީފައިވަނީ 10 މާޗް 2024 ގަ އެވެ. އެ މައްސަލައާ ގުޅިގެން ދައުލަތުން ހިފަހައްޓާފައި އޮތް "ހޮލީ ސްޕިރިޓް" 17 މާޗް 2024 ވަނަ ދުވަހު ރާއްޖެއިން ފުރުވާލާފައިވާ ކަމަށް އެ ނިންމުމުގައި ބުނެފައިވެ އެވެ.