ރާއްޖެ އަށް މިހާރު ކުރަމުން އަންނަ ހުޅަނގު މޫސުމުގެ ވިއްސާރައިގައި ވޭތުވެދިޔަ 24 ގަޑިއިރުގެ ތެރޭގައި އެންމެ ވައިގަދަވީ ހުޅުލެއަށް ކަމަށް މޫސުމާ ބެހޭ ގައުމީ އިދާރާ އިން މިއަދު ހާމަކޮށްފި އެވެ.

މެޓް އޮފީހުން ވަނީ ވޭތުވެދިޔަ 24 ގަޑިއިރު، އާންމު ވައި ޖެހުނު މިންވަރާއި ވިލާގަނޑުގައި ވައި އެންމެ ގަދަވި ބާރު މިނުގެ ރިކޯޑުތައް އާންމުކޮށްފަ އެވެ.

މެޓް އޮފީހުން އާންމު ކުރި ތަފާސް ހިސާބުތައް ދައްކާ ގޮތުން ވިލާގަނޑެއްގައި ހުޅުލެއަށް ގަޑިއަކު 63 މޭލަށް ވައިގަދަވި އެވެ. އެނގިފައިވާ ގޮތުގައި އެ ވަރަށް ވައި ގަދަވީ ރޭގައި އައި ވިލާގަނޑެއްގަ އެވެ.

ދެވަނަ އަށް އެންމެ ވައި ގަދަވީ ބ. ދަރަވަންދޫއަށެވެ. އެ ރަށަށް ވިލާގަނޑުގައި 62 މޭލަށް ވައި ގަދަވިއެވެ. ތިން ވަނަ އަށް ވައިގަދަވީ ކ. ގާފަރަށެވެ. ގާފަރަށް ވިލާގަނޑުގައި 57 މޭލަށް ވައިގަދަވި އެވެ.

ރާއްޖެ އަށް މިހާތަނަށް އެންމެ ވައިގަދަވީ ސ. ގަމަށެވެ. މެއި 29، 1991 ގައި ގަމަށް ގަޑިއަކު 103.5 މޭލަށް ވައިގަދަވި އެވެ.

ރާއްޖެ އަށް މި ދުވަސްވަރު މޫސުން ވަރަށް ބޮޑަށް ގޯސްވެފައިވާ އިރު، މި ފަހުން ހުޅަނގު މޫސުމުގެ ވިއްސާރަ ކުރަން ފެށި ފަހުން އެންމެ ގަދައަށް ވައި ޖެހުނު ކަމަށް ރިކޯޑު ކުރެވިފައި ވަނީ މ. މުއްޔަށެވެ. މުއްޔަށް 64 މޭލަށް ވައި ގަދަވި އެވެ.

މި ދުވަސްވަރު ގިނަ ހިސާބުތަކަށް މެޓް އޮފީހުން އޮރެންޖު އިންޒާރު ވެސް ނެރުން އާންމެވެ.