ރަށްރަށުގައި އިޖްތިމާއީ ބޭނުންތަކަށް ދިއްލާފައި ހުންނަ ބައްތިތަކުގެ ރައްކާތެރިކަން ކަށަވަރު ކުރުމުގެ މަސައްކަތް ކުރަން ނިންމާފައިވާ ކަމަށް ފެނަކަ އިން ބުނެފި އެވެ.

ފެނަކަ އިން އެގޮތަށް ބުނީ ރ. އުނގޫފާރުގައި ހުރި މަގުބައްތި ހޮޅި ދަނޑިއަކުން މަގުމަތީގައި ފެން ހެދިފައި ހުރި ތަނަކަށް ކަރަންޓް ދަތުރުކޮށް އެތަނުގައި ކުޅެން ތިބި ކުޑަ ކުއްޖަކާއި 18 އަހަރުގެ ޒުވާނަކު ކަރަންޓުގައި ޖެހުމާ ގުޅިގެންނެވެ. އެ ތަނުން ކުޑަ ކުއްޖާގެ ހާލު ރަނގަޅު އިރު، ޒުވާނާގެ ހާލު ސީރިއަސްވެގެން ފަރުވާ ދިނުމަށް މިހާރު ވަނީ މާލެ ގެނެސްފަ އެވެ.

ފެނަކަ އިން ނެރުނު ބަޔާނެއްގައި ބުނީ ރަށްރަށުގައި ދިއްލާފައިވާ ބައްތިތައް ސްޓޭންޑަޑައިޒް ކުރުމަށް ފެނަކައިން ކައުންސިލްތަކާއި މަޝްވަރާ ކުރުމަށް ނިންމާފައިވާ ކަމަށެވެ.

ރަށްރަށުގެ އިޖްތިމާއީ ދިއްލުންތަކަށް ބޭނުންކުރާ ބަނދަރާއި މަގުމަތީގެ ބައްތިތަކަކީ ކައުންސިލްތަކުގެ ބެލެނިވެރިކަމުގެ ދަށުން ބަލަހައްޓާ އެ ކޯޕަރޭޝަނުން ކަރަންޓު ފޯރުކޮށްދެމުން ގެންދާ ބައްތިތަކެއް ކަމަށް ކަމުގައި ފެނަކަ އިން ބުންޏެވެ. ނަމަވެސް ގިނަ ރަށްރަށުގެ އެބާވަތުގެ ބައްތިތަކުގައި އީއެލްސީބީ ހަރުކުރެވިފައި ނުހުންނަ ކަން ފާހަގަ ކުރެވޭ ކަމުގައި އެ ކުންފުނިން ބުންޏެވެ.

އެހެންވެ އެކަން ހައްލު ކުރުމަށް ކުރިޔަށް އޮތް މަހެއްހާ ދުވަސްތެރޭގައި ފެނަކަ އިން ހިދުމަތް ދެމުން ގެންދާ ހުރިހާ ރަށެއްގައި އިންސްޕެކްޝަންތަކެއް ކުރިއަށް ގެންދިއުމަށް ނިންމާފައިވާ ކަން ވެސް ފެނަކަ އިން ވަނީ ހާމަކޮށްފަ އެވެ. އަދި ކައުންސިލްތަކާއި އެއްބަސް ވެވޭ ގޮތެއްގެ މަތިން، ދެމެހެއްޓެނެވި ގޮތެއްގައި ފެނަކައިގެ ފަރާތުން އިޖްތިމާއީ ބޭނުމަށް ދިއްލާ ބައްތިތައް ބެލެހެއްޓުމަށް ހުށަހެޅުމުގެ މަސައްކަތް ވެސް ކުރަމުންދާ ކަމަށް ފެނަކަ އިން ބުންޏެވެ.

ކައުންސިލްތަކުން ގޮވާލާ ވަގުތުތަކުގައި ފެނަކައިގެ ޓެކްނިކަލް ބޭފުޅުންގެ އެހީތެރިކަން ފޯރުކޮށްދެމުންދާ ކަމުގައި ފެނަކަ އިން ބުންޏެވެ.