ނިއު ޔޯކް (މެއި 31) - އެމެރިކާގެ ރިޔާސީ އިންތިޚާބުގައި ކެންޑިޑޭޓުން ޚަރަދު ކުރަން އޮންނަ އުސޫލާ ޚިލާފަށް އޮޅުވާލައިގެން ޚަރަދުކުރިކަން ކުރީގެ ރައީސް ޑޮނަލްޑް ޓްރަމްޕުގެ މައްޗަށް ސާބިތުވެ އެމަނިކުފާން ކުށްވެރިވާ ކަމަށް އެމެރިކާގެ ނިއު ޔޯކުގެ 12 ޖޫރީން ރޭ ކަނޑައަޅައިފި އެވެ.

ޓްރަމްޕުގެ މައްޗަށް ސާބިތުވި މައިގަނޑު ދައުވާ އަކީ ބަރަހަނާ ފިލްމު ކުޅޭ މީހެއް ކަމަށްވާ ސްޓޯމީ ޑެނިއަލްސްއާ އެކު ޓްރަމްޕް ގުޅުން ހިންގި ކަމަށް ބުނާ މައްސަލައެއްގެ ވާހަކަތައް ރިޔާސީ އިންތިޚާބުގެ ދުވަސްވަރު ނުދެއްކުމަށް އެދި ޑެނިއަލްސް އަށް ފައިސާ ދީ އަދި އެ ފައިސާ އަދި އެ ފައިސާ ބޭނުންކުރި ގޮތް އޮޅުވާލައިފައިވުމެވެ. ޖިންސީ ގުޅުމުގެ ވާހަކަތައް ސިއްރުކުރަން ފައިސާ ދިނުމަކީ ކުށެއް ނޫނެވެ. އެކަމަކު ކުށަކަށްވެފައި ވަނީ އެ ފައިސާ ހޭދަކުރި ގޮތް އޮޅުވާލައި މަކަރު ހަދާފައިވުމެވެ.

ޑެނިއަލްސްގެ އަނގަ މަޑުކުރަން 130،000 ޑޮލަރު ޓްރަމްޕުގެ ފަރާތުން ދީފައި ވަނީ އެމަނިކުފާނުގެ ވަކީލް މައިކަލް ކޯއެން މެދުވެރިކޮށެވެ. އެކަމަކު އިންތިޚާބަށް ފައިސާ ޚަރަދުކުރި ގޮތުގައި ބުނެފައި ވަނީ އެ ފައިސާ ދީފައި ވަނީ ކޯއެންގެ ގާނޫނީ މަސައްކަތުގެ އަގެއްގެ ގޮތުގައި ކަމަށެވެ.

ޓްރަމްޕް ގުޅުން ހިންގި ކަމަށް ބުނާ ސްޓޯމީ ޑެނިއަލްްސް. --ފޮޓޯ:ސީއެންއެން

ޕްރޮސެކިއުޓަރުން ޓްރަމްޕް ގޮވައިގެން ކޯޓަށް ދިޔައީ މިއީ 2016 ވަނަ އަހަރުގެ އިންތިޚާބާ ދިމާކޮށް ހިންގި އޮޅުވާލުމާއި އިންތިހާބަށް ނުފޫޒު ފޯރުވުމުގެ އަމަލެއް ކަމަށް ކަނޑައެޅުމަށެވެ. އެ އިންތިޚާބުގައި ޑިމޮކްރެޓިކް ޕާޓީގެ ފަރާތުން ވާދަކުރެއްވީ ކުރީގެ ފަސްޓް ލޭޑީ ހިލަރީ ކްލިންޓަނެވެ. ޓްރަމަޕަށް ވުރެ ގިނައިން އެމެރިކާގެ އާއްމު ރައްޔިތުންގެ ވޯޓު ހިލަރީ އަށް ލިބިވަޑައިގެންނެވި ނަމަވެސް ޓްރަމްޕް މޮޅުވީ ސްޓޭޓްތަކަށް ކަނޑައަޅާފައި އޮންނަ އިލެކްޓޯރަލް ކޮލެޖް ވޯޓުން ކުރި ހޯއްދަވައިގެންނެވެ.

ޓްރަމްޕުގެ މައްޗަށް 34 ދައުވާއެއް އުފުލި އެވެ. ޖޫރީންނަށް ފެނުނީ އެ ހުރިހާ ދައުވާއެއް ވެސް ސާބިތުވާ ކަމަށެވެ. ޓްރަމްޕުގެ މައްޗަށް ހުކުމް ކުރިން އޮންނާނީ ޖުލައި 11 ވަނަ ދުވަހު އެވެ. ޓްރަމްޕުގެ މައްޗަށް ޖަލު ހުކުމެއް ނުވަތަ ޖޫރިމަނާއެއް ވެސް އައުން އެކަށީގެންވެ އެވެ. ނަމަވެސް ޓްރަމްޕަކީ މީގެ ކުރިން ޖިނާއީ އެއްވެސް ކުށެއްގެ ދައުވާ އުފުލިފައިވާ ބޭފުޅަކަށް ނުވުމާއި އުމުރުން ދުވަސްވެފައި ހުރި ބޭފުޅަކަށްވުމުން، ޖަލު ހުކުމެއް އަތުވެދާނެ ކަމަކަށް ނުބުލެވެ އެވެ.

މިއީ އެމެރިކާގައި ރައީސްކަން ކުރި ބޭފުޅެއްގެ މައްޗަށް ޖިނާއީ ދައުވާއެއް ސާބިތުވި ފުރަތަމަ ފަހަރެވެ.

މި އަހަރު ނޮވެމްބަރު މަހު އޮންނަ ރިޔާސީ އިންތިޚާބުގައި ވެސް ރިޕަބްލިކަން ޕާޓީގެ ފަރާތުން ޓްރަމްޕް ވާދަކުރައްވަ އެވެ. ޑިމޮކްރެޓިކް ކެންޑިޑޭޓަކީ މިހާރުގެ ރައީސް ޖޯ ބައިޑަން އެވެ.

ކުށް ސާބިތުވުމުން އެމެރިކާގެ އިންތިޚާބުގައި ވާދަކުރެވިދާނެބާ؟

ޖިނާއީ ކުށެއް ސާބިތުވެފައި ހުރުމުން އެމެރިކާގެ ރިޔާސީ އިންތިޚާބުގައި ވާދަކުރުމަށް އެ ގައުމުގެ ގާނޫނު އަސާސީ ހުރަހެއް ނާޅަ އެވެ. ޖަލުގައި ކުށްވެރިއެއްގެ ގޮތުގައި ހުރެގެން ވެސް އެމެރިކާގެ ރިޔާސީ އިންތިޚާބުގައި ވާދަކުރެވެ އެވެ.

އެމެރިކާގެ ގާނޫނު އަސާސީގައި ބުނެފައިވާ ގޮތުން ރިޔާސީ ކެންޑިޑޭޓެއްގައި ހުރުން ލާޒިމް ކުރަނީ މަދު ޝަރުތުތަކެކެވެ.

އެމެރިކާގެ ރިޔާސީ ކެންޑިޑޭޓެއްގެ ހުރުން ލާޒިމް ޝަރުތުތައް

  • އުމުރުން 35 އަހަރުވެފައިވުން
  • އެމެރިކާ އަށް އުފަން މީހެއް ކަމަށްވުން
  • އެމެރިކާގައި މަދުވެގެން 14 އަހަރު ދިރިއުޅެފައިވުން

އެހެންވެ ޖިނާއީ ކުށެއްގެ ރެކޯޑް އޮތް މީހަކަށް ރިޔާސީ އިންތިޚާބުގައި ވާދަކުރުމަށް ގާނޫނީ ހުރަހެއް ނެތެވެ. އެހެންވެ ޓްރަމްޕަކީ ކުށްވެރިއެއްގެ ގޮތުގައި ހުންނަވައި، ރިޔާސީ އިންތިޚާބުގައި ވާދަކުރައްވާ ފުރަތަމަ ކެންޑިޑޭޓަށް ވާނެ އެވެ.