ރައްޔިތުންގެ މަޖިލީހުން ޖުޑިޝަލް ސާވިސް ކޮމިޝަން (ޖޭއެސްސީ) އަށް ކަނޑައަޅާ މެންބަރުގެ ގޮތުގައި މާފުށީ ދާއިރާގެ މެންބަރު ހުސައިން ރިޒާ އާދަމް ހަމަޖެއްސުމަށް ހުށަހަޅައިފި އެވެ.

ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ ދެވަނަ ޖަލްސާގައި ޖޭއެސްސީގެ މެންބަރުކަމަށް ރިޒާގެ ނަން ހުށަހަޅުއްވާފައި ވަނީ މަނަދޫ ދާއިރާގެ މެންބަރު ހުސްނީ މުބާރަކް އެވެ. މި ހުށަހެޅުމަށް މާފަންނު ދެކުނު ދާއިރާގެ މެންބަރު އަބްދުﷲ ރިފާއު ވަނީ ތާއީދު ކުރައްވައިފަ އެވެ.

ރިޒާގެ ނަން ފިޔަވާ އިތުރު ނަމެއް ޖޭއެސްސީގެ މެންބަރުކަމަށް ކަނޑައެޅުމަށް ހުށަހަޅައިފައެއް ނުވެ އެވެ.

ހުސައިން ރިޒާއަކީ ގާނޫނީ ދާއިރާއިން ތައުލީމު ހާސިލް ކުރައްވައި ޝަރީއާ އިން މާސްޓާސް ހާސިލް ކުރައްވާފައިވާ ބޭފުޅެކެވެ. އޭނާ ވަނީ ކްރިމިނަލް ކޯޓުގެ ރަޖިސްޓްރާގެ މަގާމު ވެސް ފުރުއްވައިފަ އެވެ.

ޖޭއެސްސީއަށް ރައްޔިތުންގެ މަޖިލީހުން މެންބަރަކު ކަނޑައެޅުމުން އެ މަގާމަށް އެ މެންބަރަކު އައްޔަނުކުރައްވާނީ ރައީސުލްޖުމްހޫރިއްޔާ އެވެ. މަޖިލީހުން ކަނޑައަޅާ މެންބަރެއްގެ އިތުރުން ދެން ޖޭއެސްސީގައި ހިމެނިވަޑައިގަންނަވާނީ މަޖިލީހުގެ ރައީސެވެ.

ނިމިދިޔަ 19 ވަނަ މަޖިލީހުގައި ޖޭއެސްސީ އަށް ކަނޑައަޅާފައި ވަނީ ތުޅާދޫ ދާއިރާގެ ކުރީގެ މެންބަރު ހިސާން ހުސެއިން އެވެ.