ނިކަމެތިން ހައްޖަށް ފޮނުވުމަށް ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދުގެ ދަށުން ފުރަތަމަ 50 މީހުން މިއަހަރުގެ ހައްޖުގެ އަޅުކަމަށް ފުރާފައިވާއިރު އޭގެ ތެރޭގައި ފަގީރު ނޫން މީހަކު ހިމެނޭ މައްސަލައެއް ފެންމަތިވެ އެކަން ބަލަން ފަށައިފި އެވެ.

ކުރިއަށް އޮތް ފަސް އަހަރުގެ ތެރޭގައި 1،000 ނިކަމެތިން ހިލޭ ހައްޖަށް ފޮނުވުމަކީ ރައީސް ޑރ. މުއިއްޒުގެ ވައުދެކެވެ. އެ ވައުދާ އެއްގޮތަށް މި އަހަރު ހައްޖަށް ގެންދަން ނިންމާފައި ވަނީ 50 ނިކަމެތިންނެވެ.

އެ ހުރިހާ އެންމެން ވެސް މިހާރު ތިބީ ސައުދީ އަރަބިއްޔާގަ އެވެ.

ހައްޖަށް ދިޔަ މީހުންގެ ތެރޭގައި ފަގީރު ނޫން މީހަކު ހުރި ކަން އެނގުނީ ދައުލަތުގެ މީޑިއާ "ޕީއެސްއެމް" އިން އާންމު ކުރި ވީޑިއޯއަކާ ގުޅިގެންނެވެ. އެ ވީޑިއޯ އާންމު ކުރުމާ ގުޅިގެން ގިނަ ބަޔަކު ބުނެފައި ވަނީ އޭނާއަކީ ނިކަމެއްޗެއް ނޫން ކަމަށާއި އިސްކަންދަރު ސްކޫލްގެ އިސްލާމް ޓީޗަރެއް ކަމަށެވެ. އަދި މިސްކިތެއްގައި އިމާމުވެ ނަމާދު ކުރަމުންދާ މީހެއް ކަމަށް ވެސް ބުނެފައިވެ އެވެ.

އެކަމާ ގުޅިގެން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު "މިހާރު" ނޫހަށް މިއަދު ވިދާޅުވީ ދައުލަތުގެ ހަރަދުގައި ހައްޖަށްދާ ނިކަމެތިން މިއަހަރު ކަނޑައަޅާފައި ވަނީ ކުރީ ސަރުކާރުގެ ފަގީރުންގެ ދަފްތަރުގައިވާ ހިމެނޭ މީހުންނާ އެކު ކަމަށެވެ.

އެ ލިސްޓު ދިރާސާކުރުމުގެ މަސައްކަތް މިދިޔަ އަހަރުގެ ޑިސެމްބަރުގައި ކުރި އިރު، އެ މީހާ އެ ލިސްޓަށް އަރާފައި އޮތީ ކޮވިޑްގެ ހާލަތާ ގުޅިގެން އައި ދަތި ދުވަސްތަކާ ގުޅިގެން ކަމަށް ބެލެވޭ ކަމަށް ޝަހީމް ވިދާޅުވި އެވެ.

ޝަހީމް ވިދާޅުވީ އެކަން ހިނގި ގޮތް މިހާރު ބަލަމުން އަންނަ ކަމަށެވެ.

ސަރުކާރުން ނިންމާފައި ވަނީ ފުރަތަމަ ތިން އަހަރު، އުމުރުން 50 އަހަރާއި 69 އަހަރާ ދެމެދުގެ ނިކަމެތިންނަށް ހިލޭ ހައްޖު ކުރުމަށް ފުރުސަތު ދިނުމަށެވެ. އަދި ފަހު ދެ އަހަރު 45 އަހަރާއި 69 އަހަރާ ދެމެދުގެ މީހުންނަށް ހިލޭ ހައްޖު ކުރުމުގެ ފުރުސަތު ދޭން ނިންމާފައިވެ އެވެ.

ފަގީރުންގެ ދަފުތަރުގައި އުމުރުން 50 އަހަރާއި 69 އަހަރާ ދެމެދުގެ 982 މީހުން އެބަތިއްބެވެ. އޭގެ ތެރެއިން ޝަރުތު ހަމަވާ ކަމަށް ކަނޑައެޅި 667 މީހުންގެ މެދުގައި ވަނީ ގުރު ނަގައިފަ އެވެ.

ހިލޭ ހައްޖަށް ގެންދަނީ ހައްޖުގެ އަޅުކަން ކުރިން އަދާކޮށްފައި ނުވާ މީހުންނެވެ.