ރައްޔިތުންގެ މަޖިލިހުގެ ޕީއެންސީގެ ޕާލަމެންޓްރީ ގްރޫޕްގެ ފަރާތުން ފަލަސްތީނު ފަންޑަށް 200،000ރ. މިއަދު ހަދިޔާކޮށްފި އެވެ.

ޕީއެންސީގެ މެމްބަރުން މި ފައިސާ ހަވާލު ކުރީ "ފަލަސްތީނާ އެކު ދިވެހީން" ނަމުގައި ރައީސް މުއިއްޒުގެ އިސްނެންގެވުމަކަށް ދައުލަތުގެ މީޑިއާ ޕީއެސްއެމުން އިންތިޒާމުކޮށްގެން ފެށި ޓެލެތޯންގެ ތެރެއިންނެވެ.

ފައިސާ ހަވާލު ކުރުމުގެ ރަސްމިއްޔާތުގައި މަޖިލިހުގައި ހިމެނިވަޑައިގަންނަވާ ޕީއެންސީގެ ވަރަށް ގިނަ މެމްބަރުން ބައިވެރިވެވަޑައިގެންނެވި އެވެ.

މި ފައިސާގެ އެހީ ޕީއެންސީ މެމްބަރުންގެ ފަރާތުން ހަވާލުކޮށްދެއްވީ މަޖިލިހުގެ ރައީސް އަބްދުއްރަހީމް އަބްދުﷲ އެވެ. މި ފައިސާއާ ހަވާލުވެވަޑައިގެންނެވީ ޕީއެސްއެމްގެ މެނޭޖިން ޑިރެކްޓަރު ޒީނާ ޒާހިރެވެ.

އަބްދުއްރަހީމް ވިދާޅުވީ ރައީސް ޑރ. މުހައްމަދު މުއިއްޒު ފައްޓަވައި ދެއްވި ޓެލެތޯން ބާއްވަނީ ވަރަށް މާތް މަގްސަދެއްގައި ކަމަށެވެ. އަދި މިހާތަނަށް ރާއްޖޭގައި ވެރިކަން ކުރެއްވި ބޭފުޅުންގެ ތެރެއިން ފަލަސްތީނުގެ މައްސަލައިގައި އެންމެ ބޮޑަށް މަސައްކަތް ކުރެއްވި ބޭފުޅަކީ ވެސް ރައީސް މުއިއްޒު ކަމުގައި އޭނާ ވިދާޅުވި އެވެ.

އަބްދުއްރަހީމް ވިދާޅުވި ގޮތުގައި ދިވެހިންގެ ހިތުގައި މިހާރު އެންމެ ބޮޑަށް ވިންދު ޖަހާ މައްސަލައަކީ ފަލަސްތީނުގެ ރައްޔިތުންނަށް ދިމާވެފައިވާ މައްސައެވެ. އެހެންވެ ސިޔާސީ ވިސްނުމާ ދުރުވެ، މުސްލިމުންނަށް ދިމާވެފައިވާ މި މައްސަލައަށް އެހީތެރިވުމަށް އަބްދުއްރަހީމް އެދިވަޑައިގެންނެވި އެވެ.

މި ޓެލެތޯންއަކީ ރާއްޖޭގައި ބާއްވާ އެންމެ ކާމިޔާބު ޓެލެތޯން އަކަށް ހައްދަވައި ދެއްވުމަށް ވެސް އެމަނިކުފާނު އެދިވަޑައިގެންނެވި އެވެ.