ފިލިޕީންސްގެ ނަރުހެއް ކަމަށްވާ މޭރީ ގްރޭސް މަރާލި މައްސަލާގައި އޭނާގެ ފިރިމީހާ މާވިން އެސްވައި ސަލާމަތް ކުރާނެ ކަމަށް ދައުވާލިބޭ ހަލީމަތު ލަމްހާ ބުނި ކަމަށް ލަމްހާއާ އެކު މަސައްކަތްކުރި ނަރުހަކު ކްރިމިނަލް ކޯޓުގައި މިއަދު ހެކިބަސް ދީފި އެވެ.

މޭރީ އޮކްޓޫބަރު 2021 ގައި މަރާލި މައްސަލާގައި ދައުލަތުން ދައުވާކުރަނީ އޭނާގެ ފިރިމީހާ މާވިން އެސްވައި އާއި ލަމްހާ ލޯބީގެ ގޮތުން ގުޅިގެން އުޅެމުން އެ ދެ މީހުން ބައިވެރިވެގެން މޭރީ މަރާލި ކަމަށް ބުނެ އެވެ.

މާވިންގެ މައްޗަށް ކުރަނީ އެނގި ހުރެ މީހަކު މެރުމުގެ ދައުވާ އެވެ. ލަމްހާގެ މައްޗަށް ކުރަނީ އެނގި ހުރެ މީހަކު މެރުމުގައި ބައިވެރިވުމުގެ ދައުވާ އާއި އެހެން މީހެއްގެ މުދަލަށް ހުއްދަ ނޫން ގޮތެއްގައި ބާރު ހިންގުމުގެ ދައުވާ އެވެ.

ކްރިމިނަލް ކޯޓުގައި މިއަދު ބޭއްވި އަޑުއެހުމުގައި ހެކިބަސް ދިނީ އައިޖީއެމްއެޗުގެ ނަރުހެކެވެ.

އޭނާ ބުނިގޮތުގައި މޭރީގެ ހަށިގަނޑު ހޮސްޕިޓަލްގައި އިއްވާ ލަމްހާ އެ ތަނަށް ގޮސް، މާވިން ސަލާމަތް ވާނެތޯ ބުނެ އޭނާއާ ސުވާލުކުރި އެވެ. މާވިންގެ ގައިގައި ވަކި އަޅާފައި ހުރި ނިޝާންތަކެއް ހުރުމުން އެކަމާ ކަންބޮޑުވެ އަދި ފުލުހުންގެ އިސްވެރިންގެ ތެރެއިން ދަންނަ މީހަކު ހުރިތޯ ލަމްހާ ސުވާލުކުރި ކަމަށް އެ ނަރުސް މީހާ ބުންޏެވެ. މާވިން ސަލާމަތް ކުރާނީ ލަމްހާ އަމިއްލައަށް ކަމަށް ލަމްހާ ބުނި ކަމަށް ވެސް އެ ހެކިވެރިޔާ ބުންޏެވެ.

އޭނާ ބުނިގޮތުގައި ލަމްހާ ހޮސްޕިޓަލްގައި ބަލި މީހުންނާ ވާހަކަ ދައްކާ ގޮތުންނާ އޭނާ ލަމްހާއާ މެދު އެހާ ބޮޑަޔަކަށް ގަޔާ ނުވެ އެވެ.

އެ ނަރުސް މީހާ ބުނިގޮތުގައި މޭރީ ފަންކާގައި ދަންޖެހުނީ ކަމަށް މާވިން ފުރަތަމަ ބުންޏެވެ. ނަމަވެސް، ފަހުން ބުނީ ކުޑަދޮރުގައި ދަން ޖެހުނު ކަމަށް އޭނާ ބުންޏެވެ. އަދި ދަންޖެހުނު ކަމުގެ އެއްވެސް ނިޝާނެއް މޭރީގެ ހަށިގަނޑުން ނުފެންނަ ކަމަށް އޭނާ ބުންޏެވެ.

އެ މައްސަލާގައި އިތުރު ހެކިންގެ ހެކިބަސް ނެގުން އަދިވެސް ކުރިއަށް ގެންދާނެ އެވެ.