ފަލަސްތީނުގެ ރައްޔިތުންގެ ހައްގުތައް ހިމާޔަތްކުރުމަށް އަވަސް ފިޔަވަޅުތަކެއް އެޅުމަށް ކުރީގެ ފޮރިން މިނިސްޓަރު އަދި އިދިކޮޅު އެމްޑީޕީގެ ރައީސް އަބްދުﷲ ޝާހިދު އެދިވަޑައިގެންފި އެވެ.

ޝާހިދު މިކަމަށް އެދިވަޑައިގެންނެވީ އދގެ އިންސާނީ ހައްގުތަކާ ބެހޭ އެންމެ އިސްވެރިޔާ ވޮލްކާ ޓޫކް އާ ބައްދަލުކުރައްވާ ވާހަކަ ދައްކަވަމުންނެވެ. މިބައްދަލުވުން އޮތީ މިއަދު ސްވިޓްޒަލެންޑްގެ ވެރިރަށް ޖެނީވާގައި ހުންނަ އދގެ އޮފީހުގަ އެވެ.

މި ބައްދަލުވުމުގައި ދެބޭފުޅުން ވަނީ ދުނިޔޭގެ އެކި ސަރަހައްދުތަކުގެ އިންސާނީ ހައްގުތަކުގެ ހާލަތާ ގުޅޭ ގޮތުން މަޝްވަރާކުރައްވާފަ އެވެ. ޝާހިދުގެ ވާހަކަފުޅުގައި އިންސާނީ ހައްގުތަކުގެ މުހިއްމުކަމާއި، އަދި އަދުގެ ދުނިޔޭގެ ހައްގުތަކަށް އަރައިގަތުން އިތުރުވެފައިވާ މައްސަލައާމެދު ވާހަކަފުޅު ދައްކަވައި، ކަންބޮޑުވުން ފާޅުކުރެއްވި އެވެ.

ވަކިން ހާއްސަކޮށް ފަލަސްތީނުގެ ރައްޔިތުންގެ ހައްގުތައް ނިގުޅައިގަނެވިފައިވާކަން ފާހަގަކުރައްވައި، އެކަމަށް އަވަސް ފިޔަވަޅުތަކެއް އަޅުއްވައިދެއްވުމަށް، އިންސާނީ ހައްގުތަކާ ބެހޭ އިސްވެރިޔާގެ ކިބައިން ޝާހިދު އެދިވަޑައިގަތެވެ.

އދގެ ހައިކޮމިޝަނާ ފޯ ހިއުމަން ރައިޓްސްގެ ވާހަކަފުޅުގައި، އދގެ އާއްމު މަޖިލީހުގެ ރިޔާސަތުގައި ޝާހިދު އިންނެވިއިރު އިންސާނީ ހައްގުތައް ކަށަވަރުކޮށް ކުރިއެރުވުމަށް ކުރެއްވި ގިނަގުނަ މަސައްކަތްޕުޅުތައް ފާހަގަކުރައްވައި، އެކަމަށް ތައުރީފުކުރެއްވި އެވެ. އަދި ރާއްޖޭގެ ހާރިޖީ ވަޒީރުގެ ހައިސިއްޔަތުން ކުރެއްވި މަސައްކަތްޕުޅާއި، ޝާހިދުގެ ވަޒީރުކަމުގައި ޖެނީވާގައި ރާއްޖެއިން އަދާކުރި އިސް ދައުރަށްވެސް ތައުރީފްކުރެއްވި އެވެ.