ރާއްޖޭގެ މިސްކިތްތަކުގައި ގާރީ ކްލާސްތައް ހިންގުމުގެ ހުއްދަ މި ހަފްތާ ތެރޭގައި ފަށާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

ޝަހީމް މިއަދު "އެކްސް" ގައި ކުރެއްވި ޕޯސްޓެއްގައި ވިދާޅުވީ މިސްކިތްތަކުގައި ދެ ނަމާދު ދޭތެރޭގައި ގާރީ ކްލާސް ހިންގުމަށް މި ހަފްތާގައި ހުއްދަ އަރުވާނެ ކަމަށެވެ. އަދި މި ކްލާސްތަކުގައި އިމާމުންނާއި ގުރުއާން މުދައްރިސުންނަށް ހިލޭ ސާބަހަށް ގުރުއާން ކިޔަވައިދީ ދަސްކޮށްދެވޭނެ ކަމަށާއި މިކަމަށް ޝައުގުހުރި ފަރާތްތަކުން ފޯމު ލުމަށް މި ހަފްތާގައި ހުޅުވައިލާނެ ކަމަށް ވެސް ޝަހީމް ވިދާޅުވި އެވެ.

މީގެ އިތުރުން ރާއްޖޭގެ ހާފިޒުން ދަސްވެނިވާ އިރު ލާ ގައުން ފަރުމާކުރަން އަންނަ ހަފްތާގައި އިއުލާންކުރާނެ ކަމަށް ޝަހީމް ވިދާޅުވިއެވެ. އެ ގައުންތަކުން އިސްލާމީ ސަގާފަތާއި އިލްމާއި ހަޟާރަތުގެ ރަމްޒުވާނެކަމަށްވެސް އޭނާ ފާހަގަކުރެއްވި އެވެ.

ކީރިތި ގުރްއާން ކިޔެވޭނެ ކުލާސްތައް މާލޭގެ އިތުރުން ބައެއް ރަށްރަށުގައި މީގެ ކުރީގެ އަހަރުތަކުގެ ތެރޭގައި ހިންގި ނަމަވެސް ދެމެހެއްޓެނިމި ގޮތެއްގައި އެފަދަ ކްލާސްތައް ހިލޭ ހިންގިފައިނުވެއެވެ. ހިލޭ ކީރިތި ގުރްއާން ކިޔެވޭނެ ކިލާސްތައް އިތުރު ކުރައްވާއިރު އެ ހިދުމަތް ސަރުކާރުން މުޅި ރާއްޖެއަށް ފުޅާކުރެވޭނެކަން ރައީސް ޑރ. މުޙައްމަދު މުއިއްޒު ވަނީ ވިދާޅުވެފަ އެވެ.

އެގޮތުން ކީރިތި ގުރްއާނާ ބެހޭ މަރުކަޒެއް އަލުން އިމާރާތްކުރުމަށް ބިމެއް ހަމަޖެހިގެންދާނެކަމަށް ވެސް ރައީސް ވިދާޅުވި އެވެ.