ނުރައްކާތެރިކޮށް ދުއްވި ކާރު އެކްސިޑެންޓްވުމުން ފިލި ތިން މީހަކު ހައްޔަރުކޮށްފި

ހުޅުމާލޭ ފޭސް ދޭއްގައި އިއްޔެ ނުރައްކާތެރިކޮށް ދުއްވި ކާރު އެކްސިޑެންޓްވުމުން ފިލި ތިން މީހަކު ހައްޔަރުކޮށްފި އެވެ.

އާއްމުން ފާޑުކިޔަން ފެށުމުން، މި މައްސަލައިގައި ހައްޔަރުކުރި ތިން މީހުންގެ ވަނަވަރު ފުލުހުން ވަނީ އާއްމުކޮށްފަ އެވެ.

މި މައްސަލައިގައި ހައްޔަރުކޮށްފައި ވަނީ:

• އިކްރާމުއްރަހްމާން، ހ. ނޫރަަންމާގެއާގެ، ކ. މާލެ
• އިބްރާހީމް އިކްރާމް، މ. ލޭންޑްއޮފްގާޑް، ކ. މާލެ
• ޖިނާހް އިސްމާއިލް، އާޒާދުގެ، ގދ. ކަނޑުހުޅުދޫ

ހުޅުމާލެ ދެވަނަ ފިޔަވަހީގައި ވިނަރެސް ފްލެޓްތައް ކައިރީގައި ކާރަކުން ސައިކަލެއްގައި ޖެހި ހިނގި މި އެކްސިޑެންޓުގެ ރިޕޯޓު ލިބިފައި ވަނީ އިއްޔެ މެންދުރުގެ ވަގުތެއްގަ އެވެ.

މި އެކްސިޑެންޑް ހިނގާފައި ވަނީ ބާރު ސްޕީޑުގައި ދުއްވާފައި ދިޔަ ކާރެއް ކޮންޓްރޯލް ނުވެ ގޮސް މަގުގެ އެއް ފަރާތުގައި މީހަކު މަޑުކޮށްގެން އިން ސައިކަލެއްގައި ޖެހިގެންނެވެ.

މި ހާދިސާގައި ސައިކަލުގައި އިން މީހާއަށް ބޮޑެތި ޒަޚަމްތަކެއް ލިބިފައިވެ އެވެ.

އެ އެކްސިޑެންޓްގައި އަނިޔާވި މީހާއަށް ފަރުވާދޭން ފުރަތަމަ ގެންދިޔައީ ހުޅުމާލޭ ހޮސްޕިޓަލަށެވެ. އަދި އޭގެ ފަހުން އިތުރު ފަރުވާއަށް އައިޖީއެމްއެޗްއަށް މިހާރު ވަނީ ބަދަލުކޮށްފަ އެވެ. މިހާދިސާގައި ޒަޚަމްވެފައި ވަނީ އުމުރުން 31 އަހަރުގެ މީހެކެވެ.

އޭނާގެ ހާލަތު ސްޓޭބަލް ކަމަށް ޑޮކްޓަރުންނާ ހަވާލާދީ އައިޖީއެމްއެޗުން ބުނެ އެވެ.

މިއެކްސިޑެންޓްގައި ހިމެނޭ ކާރު ދުއްވި މީހާ އެކްސިޑެންޓްވުމާއެކު ވަނީ އެ ސަރަޙައްދު ދޫކޮށް ފިލާފަ އެވެ. ނަމަވެސް ހައްޔަރުކުރި ތިން މީހުންގެ ތެރޭގައި ކާރު ދުއްވަން އިން މީހާގެ އިތުރުން އޭގައި އެވަގުތު ތިބި އިތުރު ދެ މީހަކު ވެސް ހިމެނޭ ކަމަށް ފުލުހުން ބުނެ އެވެ.