އެމްޑީޕީގެ ގައުމީ މަޖިލީހުގެ ހުސްވެފައިވާ މާލެ ދާއިރާގެ ރައީސް ކަން މާލޭގެ މޭޔަރު އާދަމް އާޒިމް ކާމިޔާބު ކުރައްވައިފި އެވެ.

މިހާތަނަށް ލިބިފައިވާ ނަތީޖާތައް ދައްކާގޮތުން އާޒިމަށް 600 އަށްވުރެ ގިނަ ވޯޓް ލިބިވަޑައިގެންފައިވެ އެވެ. އޭނައާ ވާދަކުރެއްވި ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހަށް ލިބިވަޑައިގެނެވީ 255 ވޯޓެވެ.

އެމްޑީޕީގެ މާލެ ދާއިރާގެ ރައީސްގެ ގޮނޑި ހުންނެވީ އެ މަގާމުގައި ހުންނެވި މާލޭގެ ކުރީގެ މޭޔަރު ޝިފާ މުހައްމަދު އެމްޑީޕީން ވަކިވެވަޑައިގަތުމުންނެވެ.

ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގައި އެމްޓީސީސީގެ ސީއީއޯ ކަމުގައި ހުންނެވި އާޒިމް އެމްޑީޕީއާ ގުޅިވަޑައިގަތީ ރިޔާސީ އިންތިހާބަށްފަހު އެވެ.

އާޒިމް މާލޭގެ މޭޔަރު ކަމަށް ވަޑައިގަތީ ރައީސް ޑރ. މުހައްމަދު މުއިއްޒު ރައީސުލްޖުމްހޫރިއްޔާ ކަމަށް ވަޑައިގަތުމުން ހުސްވި މޭޔަރު ކަމުގެ އިންތިހާބު ކާމިޔާބު ކުރައްވައިގެންނެވެ.