ހުޅަނގު މޫސުމުގެ ބާރު ގަދަވެ، ކުރިއަށް އޮތް ފަސް ދުވަހު މޫސުން ގޯސްވާނެކަމަށް ލަފާކޮށް، ސަމާލުވުމަށް ރާއްޖޭގެ މޫސުމާބެހޭ އިދާރާ އިން އިލްތިމާސްކޮށްފި އެވެ.

އެ އިދާރާ އިން މިއަދު ބުނެފައިވަނީ 11 އޮގަސްޓް (އާދިއްތަ) ދުވަހުން ފެށިގެން ކުރިއަށް އޮތް ފަސް ދުވަހު ރާއްޖެ ސަރަހައްދުގައި ހުޅަނގު މޫސުމުގެ ބާރު ގަދަވާނެކަމަށް ބެލެވޭތީ، ރާއްޖޭގެ ބޮޑުބަޔަކަށް ގުގުރުމާއެކު ވިއްސާރަކޮށް، ވިލާގަނޑުގައި ގަޑިއަކު 40 މޭލާއި 45 މޭލާ ދެމެދުގެ ބާރުމިނަށް ވައިގަދަވާނެ ކަމަށެވެ.

އެހެންކަމުން ބޯކޮށް ވާރޭވެހި، ވިލާގަނޑުގައި ކަނޑުތައް ގަދަވާނެކަމަށް ލަފާކުރެވޭތީ އެންމެހައި ފަރާތްތަކުން މޫސުމަށް ސަމާލުވުމަށް މޫސުމާބެހޭ އިދާރާއިން އިލްތިމާސްކުރެ އެވެ. ކަނޑުދަތުރުކުރާ ފަރާތްތަކުން ދަތުރު ފެށުމުގެ ކުރިން ފަހުގެ މޫސުމީ މައުލޫމާތު ހޯއްދަވައިގެން ދަތުރުކުރުމަށް ވެސް އެ އިދާރާއިން އެދެއެވެ.

ހުޅަނގު މޫސުމުގައި ރާއްޖޭގައި އާންމުގޮތެއްގައި ކަނޑުމަތީގެ ހާދިސާތަކާއި ރަށްރަށުގައި އަދި މާލެ ސަހަރައްހަދުގައި ފެންބޮޑުވުމުގެ މައްސަލަތައް އިތުރުވާކަން ފާހަގަ ކުރެވެ އެވެ.