ރ. ފުއްގިރި މައްސަލަ އާއި ވ. އާރަށް މައްސަލާގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް ކުރާ ހުރިހާ ދައުވާތަކެއްގެ ޝަރީއަތުގެ އަޑުއެހުންތައް މެދުކެނޑުމަކަށްފަހު މި ހަފުތާގައި ބާއްވަން ކްރިމިނަލް ކޯޓުން ހަމަޖައްސައިފި އެވެ.

ޔާމީންގެ މައްޗަށް ދައުވާކުރަނީ އެމްއެމްޕީއާރުސީ މެދުވެރިކޮށް ރ. ފުއްގިރި ކުއްޔަށް ދޫކުރި މައްސަލަ އާއި ވ. އާރަށް މައްސަލާގަ އެވެ. އެއީ ރިޝްވަތުގެ ގޮތުގައި އެއް މިލިއަން ޑޮލަރު ގަބޫލު ކުރައްވައި، އެ ފައިސާ ލޯންޑާ ކުރެއްވި ކަމަށް ބުނެ އެވެ.

މީގެ ތެރެއިން އާރަށް މައްސަލާގައި ޔާމީންގެ މައްޗަށް އިއްވި 11 އަހަރުގެ ޖަލު ހުކުމް ބާތިލް ކުރުމަށްފަހު ހައި ކޯޓުން އެންގީ އެ މައްސަލަ އަލުން ބެލުމަށެވެ. ނަމަވެސް ފުއްގިރި މައްސަލަ މިހާތަނަށް ކްރިމިނަލް ކޯޓުގައި އޮތީ ކުރިއަށް ނުގޮސް މަޑުޖެހިފަ އެވެ.

އޭގެ ތެރެއިން ފުއްގިރި މައްސަލާގެ ޝަރީއަތް އަންނަ އަންގާރަ ދުވަހަށް ތާވަލް ކޮށްފައި ވާއިރު، އާރަށް މައްސަލާގެ ޝަރީއަތް އަންނަ ބުދަ ދުވަހަށެވެ. އެ ދެ މައްސަލަ ވެސް މިހާރު ބައްލަވަނީ ގާޒީ އަލީ ނަދީމެވެ.

ފުއްގިރި މައްސަލާގައި ރިޝްވަތުގެ ދައުވާ އާއި މަނީ ލޯންޑްރިންގެ ދައުވާ ކުރާއިރު, އާރަށް މައްސަލާގައި ވެސް ރިޝްވަތުގެ ދައުވާ އާއި މަނީ ލޯންޑްރިންގެ ދައުވާ ކުރެ އެވެ. މި ދައުވާތައް ސާބިތުވެއްޖެނަމަ ބޮޑު ޖަލު ހުކުމެއް އަންނާނެ އެވެ.