މާފުށީ ޖަލަށް މަސްތުވާތަކެއްޗާއި ފޯނު ވައްދާކަމުގެ ތުހުމަތު ކުރެވި ހައްޔަރުކުރި ކަރެކްޝަނަލް ސާވިސްގެ އޮފިސަރުންގެ ތެރެއިން ފަސް މީހެއްގެ މައްޗަށް ދައުވާ އުފުލައިފި އެވެ.

ފުލުހުން ހިންގި އޮޕަރޭޝަނެއްގައި ކ. މާފުށީ ޖަލަށް މަސްތުވާތަކެއްޗާއި ފޯނު ވެއްދިކަމަށް ތުހުމަތުވާ މޯލްޑިވްސް ކަރެކްޝަނަލް ސާވިސްގެ 13 އޮފިސަރުންގެ މައްސަލަ ތަހުގީގުކޮށް ނިންމައި ދައުވާކުރުމަށް ޕްރޮސިކިއުޓާ ޖެނެރަލްގެ އޮފީހަށް މި މަހު 10 ގައި ވަނީ ފޮނުވާފަ އެވެ.

ފުލުހުން ވަނީ މީގެކުރިން މި 13 އޮފިސަރުންގެ ފޮޓޯ އާއި ވަނަވަރު އާއްމުކޮށްފަ އެވެ.

ޕީޖީ އޮފީހުން މިއަދު ބުނީ، މި މައްސަލާގައި ހިމެނޭ ފަސް މީހެއްގެ މައްޗަށް ދައުވާ ކުރުމަށް އިއްޔެ ކްރިމިނަލް ކޯޓަށް ހުށަހަޅާފައިވާ ކަމަށެވެ.

ދައުވާކުރި ފަސް މީހުނަކީ ޖިނާހް އަބްދުއްރަހީމް، ރ. އުނގޫފާރު، އައިވަރީހައުސް، އަލީ ނާޒިމް، ހދ. ނޭކުރެންދޫ، ތަރާނާގެ، އަލީ އަސްފާގް، ނ. ލަންދޫ، ކާމިނީގެ، އަލީ ހިޝާމް، ކ. މާފުށި، ބީޗްހައުސް އަދި މުހައްމަދު ފަތޫހު ފަތުހުﷲ، ގއ. ވިލިނގިލި، ކުއްޅަވައްގެ އެވެ.

މީގެ ތެރެއިން ޖިނާހް އަބްދުއްރަހީމާއި އަލީ ހިޝާމްގެ މައްޗަށް ވަނީ ތިން ދައުވާއެއް ކޮށްފަ އެވެ. އެއީ، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ އާއި މަނީ ލޯންޑަރިން ކުށުގެ ދައުވާއާއި ނުހައްގު މުއްސަނދިކަން ހޯދައި ލިބިގަތުމުގެ ކުށުގެ ދައުވާ އެވެ.

ދެންތިބި ތިން މީހުންގެ މައްޗަށް އުފުލާފައިވަނީ ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ކުށުގެ ދައުވާ އާއި ނުހައްގު މުއްސަނދިކަން ހޯދައި ލިބިގަތުމުގެ ކުށުގެ ދައުވާ އެވެ.

މައްސަލައިގައި ހިމެނޭ އިތުރު މީހުންގެ މައްޗަށް ދައުވާކުރެވޭ ވަރަށް ހެކިލިބިފައި ނުވާތީ، އެމީހުނަށް މިވަގުތު ދައުވާ ނުކުރަން ނިންމާފައިވާކަމަށް ޕީޖީ އޮފީހުން ބުނެ އެވެ. މި މައްސަލައާ ގުޅޭ އިތުރު ތަހުގީގު އަދިވެސް ފުލުހުން ކުރިއަށް ގެންދާތީ އެމީހުނަށް ދައުވާކުރުމާ މެދު ގޮތެއް ނިންމާނީ ތަހުގީގުތައް ނިމުމުން ކަމަށްވެސް އެ އޮފީހުން ބުނެ އެވެ.

ޖަލުގައި ގައިދީންނަށް ފޯނާއި މަސްތުވާތަކެތި ފޯރުކޮށްދިނުމަށް އެހީތެރިވެދޭ ބޮޑު ނެޓްވޯކެއް ހައްޔަރުކޮށްފައިވަނީ ނިމިދިޔަ ޖޫން މަހު އެވެ. އެކަމާ ގުޅިގެން ހޯމް މިނިސްޓަރު ދެއްވި ޕްރެސް ކޮންފަރެންސެއްގައި ވިދާޅުވީ ކަރެކްޝަންސްގެ 18 އޮފިސަރެއްގެ އެކައުންޓަށް 73 މިލިއަން ރުފިޔާ ޖަމާކޮށްފައިވާ ކަމަށެވެ. އަދި އެއް އޮފިސަރުގެ އެކައުންޓަށް އެކި ފަހަރު މަތިން 24 މިލިއަން ރުފިޔާ ޖަމާވި ކަމަށް އިހުސާން ވިދާޅުވި އެވެ.