ބަންގްލަދޭޝްގެ ޗިޓަގޮން މެޑިކަލް ކޮލެޖުގައި މަސައްކަތްކުރާ ދިވެހި ދެ ޑޮކްޓަރަކަށް ހަމަލާދީފި އެވެ.

މި ހާދިސާ ހިނގާފައިވަނީ ރޭގެ ވަގުތެއްގަ އެވެ. މައުލޫމާތު އެނގޭ މީހަކު "ހުރިހާ" އަށް ކިޔާދިންގޮތުގައި ދިވެހި ދެ އިންޓާން ޑޮކްޓަރުން ބަލި މީހުންނަށް ފަރުވާ ކުރުމަށް ޑިއުޓީގައި މަސައްކަތް ކުރަމުން ދަނިކޮށް ބަޔަކު ވަނީ ދެ ޑޮކްޓަރުންނަށް ޖިސްމާނީ އަނީޔާތަކެއް ދީފަ އެވެ.

އެތަނުން އެއް ޑޮކްޓަރު ގައިގައި ޖަހާފައިވާއިރު، އަނެއް ޑޮކްޓަރުގެ އަތުގައި ހިފައި ދަމައިގަނެ ވަރަށް ހަޑިހުތުރުކޮށް ވާހަކަ ދައްކާފައިވެ އެވެ.

މި ޑޮކްޓަރުންނަށް ހަމަލާދިނީ ފަރުވާ ދެމުން ދަނިކޮށް މަރުވި މީހެއްގެ އާއިލާ ބައެއްކަމަށްވެ އެވެ. މިހާދިސާ ހިނގީ ވޯޑުގައި އޮތް އެ މީހާ މަރުވުމުން، އޭނާގެ މަރުގެ ސެޓްފިކެޓް ތައްޔާރުކުރުމަށް އައިޑީ ކާޑު ނަގަން އާއިލާގެ ގާތަށް ދިޔަ ވަގުތު އެވެ.

އެ ވަގުތު ހޮސްޕިޓަލުގައި ތިބި ބައެއް ސީނިއާ މީހުން ވަނީ އެ ދެ ޑޮކްޓަރުން ސަލާމަތްކުރަން އެމީހުން ސްޓޯ ރޫމަށް ގެންގޮސްފަ އެވެ. އެތަނުގައި އެމީހުން ދެ ގަޑިއިރެއް ހާއިރު ތިބެންޖެހުނުކަމަށްވެ އެވެ.

އެ ދެ ޑޮކްޓަރުންނަށް އަނިޔާ ކުރި ފަރާތުން، އެވާހަކަތައް ދޮގުކޮށް، ސީސީޓީވީން ހެކި ދެއްކުމަށް ބުނެފައިވާއިރު، ހޮސްޕިޓަލުގެ ޑައިރެކްޓަރު ވަނީ މިއީ ސީރިއަސް މައްސަލައެއްގެ ގޮތުގައި ބަލައި، އަޅަންޖެހޭ ޖެހޭ ފިޔަވަޅުތައް އަޅާނެ ކަމަށް ބުނެފަ އެވެ.

ބަންގްލަދޭޝްގައި ރާއްޖޭގެ ވަރަށް ގިނަ މެޑިސިން ކިޔަވަމުންދާ އިންޓާން ޑޮކްޓަރުން ކޯސްފުރިހަމަ ކުރަމުން ދެ އެވެ.

މި މައްސަލައިގައި މިހާތަނަށް ރަސްމީ އެއްވެސް އިދާރާއަކުން އެއްޗެއް ބުނެފައިނުވެ އެވެ.