އައްޑޫ ސިޓީގައި އިންޑިއާގެ ކޮންސިއުލޭޓް ހުޅުވުމަށް މަޝްވަރާ ކުރެއްވިކަމަށް އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެ އެވެ.

ރައީސް އިބްރާހީމް މުހައްމަދު ސޯލިހުގެ ވެރިކަމުގައި އައްޑޫގައި އިންޑިއާގެ ކޮންސިއުލޭޓެއް ހުޅުވުމަށް މަޝްވަރާކުރުމުން ކުރިން އިދިކޮޅުގައި ތިބި، މިހާރުގެ ވެރިކަންކުރާ ޕީޕީއެމް ކޯލިޝަނުންވަނީ ވަރަށް ބޮޑަށް ފާޑުކިޔާ އެކަމާ ދެކޮޅުހަދާފަ އެވެ.

ރައީސް މުހައްމަދު މުއިއްޒު މިހާރު އިންޑިއާއަށް ކުރައްވަމުން ގެންދަވާ ފުރަމާނަ ދަތުރުފުޅުގައި ބޮޑުވަޒީރު މޯދީއާ އެކު ބޭއްވެވި މަޝްވަރާތަކަށް ފަހު ދެ ބޭފުޅުން ދެއްވި ގުޅިފައިވާ ބަޔާނުގައި މޯދީ ވިދާޅުވީ ރާއްޖެ އާއި އިންޑިއާ އަކީ ޒަމާނުއްސުރެ އެކުވެރި، ގާތް ގުޅުމެއް އޮންނަ ދެ ގައުމު ކަމަށާއި ދެ ގައުމުގެ ރައްޔިތުންނަކީ ވެސް ގާތް ބައެއް ކަމަށެވެ.

އައްޑޫގައި އިންޑިއާގެ ކޮންސިއުލޭޓެއް ހުޅުވުމަށާއި އޭގެ ބަދަލުގައި އިންޑިއާގެ ބެންގަލޫރުގައި ރާއްޖޭގެ ކޮންސިއުލޭޓެއް ގާއިމް ކުރަން މަޝްވަރާ ކޮށްފައިވެ އެވެ.

މޯދީ ވިދާޅުވީ އިންޑިއާގެ އެގްޒިމް ބޭންކުގެ ކްރެޑިޓް ލައިންގެ އެހީ އާއި ހިލޭ އެހީގެ ދަށުން ކުރިއަށްދާ ގްރޭޓާ މާލެ ކަނެކްޓިވިޓީ ޕްރޮޖެކްޓު ނުވަތަ ތިލަމާލެ ބްރިޖު މަޝްރޫއުގެ މަސައްކަތް ހަލުވި ވެގެންދާ ތަން ދެން ފެންނާނެ ކަމަށެވެ.

ރައީސް މުއިއްޒުއާއި ބޮޑުވަޒީރު މޯދީގެ ބައްދަލުވުމަށް ފަހު ވަނީ ރާއްޖެއިން އިންޑިއާއާއެކު މުހިންމު ފަސް އެމްއޯޔޫއެއްގައި މިއަދު ސޮއިކޮށްފަ އެވެ.

ދެ ގައުމުން ގުޅިގެން މަސައްކަތްކުރުމަށް އިންޑިއާގެ ރާޝްތިރިޔާ ރަކްޝާ ޔުނިވާސިޓީ އޮފް އިންޑިއާ އާއި ނެޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓް އޮފް މޯލްޑިވްސްއާ ދެމެދު ވަނީ އެމްއޯޔޫއެއްގައި ސޮއިކޮށްފަ އެވެ.

މީގެ އިތުރުން ކަރަންސީ ސްވޮޕް އެއްބަސްވުމެއްގައި ވެސް ދެ ގައުމުގެ ފަރާތުން ވަނީ ސޮއިކޮށްފަ އެވެ.

ކޮރަޕްޝަނާ ނައްތާލުމާ ގުޅޭ އެމްއޯޔޫގައި އޭސީސީއާއެކު ސޮއިކުރީ ސެންޓްރަލް ބިއުރޯ އޮފް އިންޑިއާއާ އެކުގަ ސޮއިކޮށްފައިވާއިރު، ނެޝަނަލް ޖުޑީޝަލް އެކެޑަމީ އޮފް އިންޑިއާ (އެންޖޭއޭއައި) އަދި ޖުޑީޝަލް ސާވިސް ކޮމިޝަން އޮފް މޯލްޑިވްސް (ޖޭއެސްސީ) އާ ދެމެދު ކުރިން ހަދާފައި އޮތް އެމްއޯޔޫ ވަނީ އާކޮށްފަ އެވެ. ރާއްޖޭގައި ޒުވާނުންނާއި ކުޅިވަރުގެ ދާއިރާއިން ކުރިން ހަދާފައި އޮތް އެމްއޯޔޫ ވެސް ވަނީ އާކޮށްފަ އެވެ.