އުމުރުން 45 އަހަރުން ދަށުން އަންހެނުން މަހުރަމަކާ ނުލައި އުމްރާއަށް ނުދެވޭ ގޮތަށް އޮތް މާއްދާ، އިއްޔެ އާންމު ކުރި ދިވެހިރާއްޖޭން އުމްރާއަށް މީހުން ގެންދިޔުމާ ބެހޭ އުސޫލުން އުނިކުރަން އިސްލާމިކް މިނިސްޓަރު މުހައްމަދު ޝަހީމް އަލީ ސައީދު އަންގަވައިފި އެވެ.

އެއްދުވަސް ތެރޭގައި އުސޫލަށް ބަދަލު ގެންނަވަން މިނިސްޓަރު އަންގެވިކަން ހާމަކުރެއްވީ މީޑިއާތަކަށް ފޮނުއްވި މެސެޖެއްގަ އެވެ. ޝަހީމް ވިދާޅުވީ 45 އަހަރުން ދަށުގެ އަންހެނުން މަހުރަމަކާ ނުލައި އުމްރާއަށް ނުދެވޭ ގޮތަށް އޮތް މާއްދާ އުވާލަން އެންގީ ސައުދީއަރަބިއްޔާގެ ގަވާއިދުން އެ މާއްދާ މިހާރު އުވާލާފައި ވާތީ ކަމަށެވެ.

"މިއީ ސައޫދީގެ ހައްޖާއި އުމްރާ އާ ބެހޭ އުސޫލުތަކުގައި އެހެން އޮންނާތީ ރާއްޖޭގެ މިހައިތަނަށް އަމަލު ކުރާ ހައްޖު އުމަރާ އާ ބެހޭ ހުރިހާ އުސޫލެއްގައި ކުރިން ވެސް އޮންނަ މާއްދާއެއް،" މާއްދާ އުވާލަން އެންގެވިކަން ހާމަކުރައްވަމުން ޝަހީމް ވިދާޅުވި އެވެ.

މަހުރަމަކާ ނުލައި ހައްޖާއި އުމްރާއަށް ދެވޭ ގޮތަށް ސައުދީއަރަބިއްޔާއިން ފުރަތަމަ ބަދަލުކުރީ ކޮވިޑު-19 އާ ގުޅިގެން ހައްޖުގެ އަޅުކަން މެދުކެނޑުމަށްފަހު 2021 ވަނަ އަހަރު އެ ފުރުސަތު ހުޅުވައިލިއިރު އެވެ. އެ ނިންމުން ދާއިމީކޮށް ސައުދީގެ އުސޫލު ބަދަލު ކުރީ މިދިޔަ އަހަރު ފަހުކޮޅު އެވެ.

މިފަހަރުވެސް އިސްލާމިކް މިނިސްޓަރަށް މި ބަދަލު އެނގިވަޑައިގެންފައި މިވަނީ އުސޫލު ގެޒެޓްކުރި ފަހުން، ނޫސްތަކުގެ ސުރުހީތަކުންކަމަށް ބެލެވެ އެވެ. މިދިޔަ ހަފްތާގައި އިސްލާމީ މަރުކަޒު ސަރަހައްދުގައި މަސްފެންގަނޑެއް ހެދުމަށް އިއުލާން ކުރުމާއެކު އަނެއް ދުވަހު މިނިސްޓަރަށް ވަނީ ރާއްޖޭގެ މާލީ ހާލަތު ވިސްނިވަޑައިގެން މަސްފެންގަނޑު ހަދަން އެ މިނިސްޓްރީން ކުރި އިއުލާން ބާތިލްކުރަން އަންގަވާފަ އެވެ.