މި ދުވަސްވަރަކީ ވައިގަދަ، ވިއްސާރަ ދުވަސްވަރަކަށް ވުމާއެކު، ސިނަމާލެ ބްރިޖު އަދި ހައިވޭއިން ދަތުރުކުރައްވާއިރު ތިމާއާއި އަނެކުންގެ ސަލާމަތާއި ރައްކާތެރިކަމަށް ބަލައިގެން އުޅަނދު ދުއްވުމަށް ފުލުހުން އިލްތިމާސްކޮށްފި އެވެ.

ފުލުހުން ބުނެފައިވަނީ ސައިކަލު ދުއްވާއިރު ކުޑަނަގައިގެން ނުދުއްވުމަށާއި ފަސޭހައިން ހަލާކުވެ ވަޔާދާ ފަދަ ކޯޓު ބޭނުންނުކުރުމަށާ އަދި ހެލްމެޓު ވެސް ވަޔާ ނުދާނޭހެން ރަނގަޅަށް އެޅުމަށެވެ، އަދި އުޅަނދުގެ ލައިޓުތައް ދިއްލޭތޯ ބަލައި ސަލާމަތާއި ރައްކާތެރިކަން ކަށަވަރު ކޮށްގެން އުޅަނދު ދުއްވުމަށް އިލްތިމާސްކުރާކަމަށެވެ.

މީގެ އިތުރުން ފުލުހުން ވަނީ މީ ކަނޑުގަދަ އަދި ވިއްސާރަ ދުވަސްވަރަކަށް ވުމާއެކު، ކޮންމެހެން ކުރަން ޖެހިއްޖެ ހާލަތުގައި މެނުވީ ކަނޑުދަތުރު ނުކުރުމަށް އެދިފަ އެވެ.

ރާއްޖެއަށް ހުޅަނގު މޫސުމުގެ ބާރުގަދަވެ، މިދުވަސްވަރު މޫސުން ގޯސްވާނެކަމަށް މޫސުމާ ބެހޭ ގައުމީ އިދާރާއިން ވަނީ ބުނެފަ އެވެ. އެގޮތުން މިއަދުވެސް ރާއްޖޭގެ އެކި ކަންކޮޅުތަކަށް ދަނީ ވަރަށް ބޯކޮށް ވާރޭވެހި ވައިގަދަވަމުންނެވެ.

މެޓް އޮފީހުން ވަނީ މިއަދު މެންދުރުފަހު 3:00 އިން ރޭގަނޑު 7:00 އަށް ރ އަތޮޅުން ފެށިގެން ވ އަތޮޅަށް ވައިގަދަވާނެކަމަށް ލަފާކޮށް ޔެލޯ އެލާޓް ނެރެފަ އެވެ. އެ އިދާރާއިން ބުނީ މި ސަރަހައްދުތަކަށް ގަޑިއަކު 28 މޭލާއި 35 މޭލާ ދެމެދުގެ ބާރުމިނެއްގައި ވައިޖެހޭނެކަމަށާއި، ވިލާގަނޑުގައި 55 މޭލަށް ވައިގަދަވެ ކަނޑުތައް ވަރަށް ގަދަވާނެކަމަށް ލަފާކުރެވޭކަމަށެވެ.