ޖަޕާން ސަރުކާރުގެ ހިލޭ އެހީގައި ދިވެހި ފުލުހުންގެ ހިދުމަތަށް 2.5 މިލިއަން ޑޮލަރު (38 މިލިއަން ރުފިޔާ) ގެ ސީސީޓީވީ ކެމެރާ އިކުއިޕްމަންޓް ހަދިޔާކޮށްފި އެވެ.

ދިވެހި ފުލުހުންގެ ހިދުމަތުގެ ފަރާތުން މި ތަކެއްޗާ ހަވާލުވެވަޑައިގަތީ ކޮމިޝަނާ އޮފް ޕޮލިސް އަލީ ޝުޖާއު އެވެ. ޖަޕާން ސަރުކާރުގެ ފަރާތުން މި ތަކެތި ހަވާލުކޮށްދެއްވީ ޖަޕާނުން ދިވެހި ރާއްޖެއަށް ކަނޑައަޅުއްވާފައި ހުންނަވާ ސަފީރު ޓަކެއުޗީ މިދޯރީ އެވެ.

އިސްކަންދަރު ކޮށީގައި ބޭއްވި މި ރަސްމިއްޔާތުގައި ސީޕީ ޝުޖާއު ދެއްކެވި ވާހަކަފުޅުގައި ފުލުހުންގެ މުއައްސަސާގެ ކުރިއެރުމަށް ބޭނުންވާ އެކި ވަސީލަތްތައް ފޯރުކޮށްދެއްވުމުގައި ޖަޕާނުގެ ސަރަކާރުން ވެދެއްވާ އެހީއަށް ވަނީ ޝުކުރުއަދާ ކުރައްވާފަ އެވެ. އަދި ޖަޕާނު ސަރަކާރުން ދެއްވި އެހީގެ އަގުވަޒަން ކުރުމުގެ ގޮތުން ދިވެހި ފުލުހުންގެ ހިދުމަތުގެ ފަރާތުން ޖަފާނު ސަފީރަށް ހަނދާނީ ފިލައެއް ވެސް އަރުވާފައިވެ އެވެ.

ޖަފާނު ސަރުކާރުން ދީފައިވަނީ އެއްގަމުން ކަނޑުގެ ސަރަހައްދު އަދި ބަނދަރުމަތި ބެލެވޭ ކެމެރާ އެކުއިޕްމެންޓެވެ.

ޖަޕާނަކީ ދިވެހިރާއްޖޭގެ އެކި ކަންކަމަށް އެންމެ ބޮޑަށް އެހީވާ އެއް ގައުމެކެވެ. މި ދިޔަ ޖުލައި މަހު ވެސް އިންސާނީ ވަސީލަތްތައް ތަރައްގީ ކުރުމުން ޖަޕާނު ސަރުކާރުން ވަނީ އެއް މިލިއަން ޑޮލަރުގެ ހިލޭ އެހީ ދީފަ އެވެ.