ހަރަދު ކުޑަކުރުމުގެ ނަމުގައި ރައީސް މުހައްމަދު މުއިއްޒު ރައްޔިތުންގެ ލޮލުގައި އަނދުން އަޅުވަން މަސައްކަތް ކުރައްވާކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި ޑރ. ޖަމީލް ވިދާޅުވީ ރައީސްގެ ބަހާއި އަމަލު ދިމާނުވާކަން މިހާރުވެސް ފެންނަ ކަމަށެވެ.

ރައީސް މުއިއްޒު ވަނީ ސިޔާސީ މުވައްޒަފުންނާއި ސަރުކާރުގެ އިސްވެރިން އަދި ކުންފުނިތަކުގެ ވަކި ލެވަލްއެއްގެ މުވައްޒަފުންގެ މުސާރައިން 10 ޕަސެންޓް އުނިކުރުމަށް ނިންމާފައިވާކަން އިއުލާން ކުރައްވާފަ އެވެ. މީގެ އިތުރުން ރައީސް ގެ މުސާރައިގެ 50 ޕަސެންޓް ނެންގެވުމަށް ވެސް ވަނީ ނިންމަވާފަ އެވެ.

މިކަމާ ގުޅިގެން ޑރ. ޖަމީލް ވިދާޅުވީ އެއަށް ވުރެ ސަރުކާރު ކުންފުނިތަކުން ނިޒާމުން ބޭރުން ރައީސް މުއިއްޒު ކޮންމެ މަހަކު 25 މިލިއަންވަރު ނަންގަވަމުން ދާކަމަށް ކުރެވޭ ތުހުމަތަށް ހައްލު ހޯދަންޖެހޭ ކަމަށެވެ. މިކަމުގެ ހުއްޖަތުގެ ގޮތުގައި ޑރ. ޖަމީލް ވިދާޅުވީ މެމްބަރުންނަށް ބަހަމުންދާ ފައިސާއާއި ޕީއެންސީން ކުއްޔަށް ހިފަމުންދާ އެތައް ބުރީގެ އިމާރާތްތަކާއި ޓީވީ ސްޓޭޝަންތަކަކީ ކޮންތާކުން ޕީއެންސީ ހޯދި ފައިސާއެއްކަން ނޭނގުން ކަމަށެވެ.

މީގެ އިތުރުން ރައީސް މުއިއްޒު މަޖްލިސް އިންތިހާބާ ދިމާކޮށް ރަސްމާލެ ރާޖޫއަށް 70 އެތަކެއް މިލިއަން އަދި ހުޅުމާލޭ އިން ބިން ދިނުމަކީ ފައިސާ ނަގަން އުފަން ކުރި މަޝްރޫއެއް ކަމަށް ޖަމީލް ވިދާޅުވި އެވެ. ރައީސް މުއިއްޒު ވެރިކަމާ ހަވާލުވެވަޑައިގެން ތުރުކީން ގަތް ޑްރޯންތަކަކީވެސް ކިކްބެކްގެ ގޮތުގައި ފައިސާ ހޯދުމަށް ކުރެއްވި ކަމެއް ކަމަށް ތުހުމަތު ކުރެވޭކަމަށް އޭނާ ވިދާޅުވި އެވެ.

މުލިއާގެ އާއި މުރައިދޫގެއާއި މިތަންތަން މަރާމާތާއި އެކި އިވެންޓްތައް ވަކި ކުންފުންޏަކަށްދީ އެތައް މިލިއަނުން ރައީސް މުއިއްޒު ފައިސާ ނަންގަވާފައިވާ ކަމުގެ ތުހުމަތުކުރެވޭ ކަމަށާއި ސަރުކާރު ކުންފުނިތައް އަދިވެސް ވަޒީފާތަކުން ބަރާކުރަމުންދާކަމާއި އެމްބަސީތަކުގައި ބޭކާރު ވަޒީފާތައް މުސާރައިގައި އެއްވެސް މަސައްކަތެއްނުކޮށް ތިބުމަށް މީހުން ނަގަމުންދާކަމަށް އޭނާ ވިދާޅުވި އެވެ.

ހަރަދު ކުޑަކުރެއްވުމަށް ކަންކަން އިއުލާން ކުރައްވަނީ މިކަންކަން އޮއްބާލެއްވުމަށް ކަމަށްވެސް ޑރ. ޖަމީލް ވިދާޅުވި އެވެ.

"ކަމެއް ކުރަންޏާ ރޯމާދުވާލު ކުންފުނިތަކުންނާއި ސަރުކާރުގެ ތެރެއިން ކުރަމުންދާ ކޮރަޕްޝަނާއި ވައްކަން ހުއްޓުވާ! އެމްޕީއެލް، އެޗްޑީސީ، ގޭސް ކުންފުނި، ފެނަކަ، މިއީ މިއަދު ރައްޔިތުންނަށް މުސީބާތައްވެފައިވާތަންތަން! މަނިކުފާނު އެތަންތަން ލޫޓްވަމުންދާކަމަށް ރަށުތެރޭ ވާހަކައޮތީ!" އޭނާ ވިދާޅުވި އެވެ.