ރައީސުލްޖުމްހޫރިއްޔާއާއި ވަޒީރުން، މަޖިލިސް މެންބަރުން އަދި ފަނޑިޔާރުން ނުހައްގު މުއްސަނދިކަން ހޯދައިފިނަމަ 15 އަހަރަށް ޖަލަށްލުމަށް ހުށަހަޅާ ބިލެއް މިއަދު ރައްޔިތުންގެ މަޖިލީހަށް ހުށަހަޅައިފި އެވެ.

ސަރުކާރުގެ ފަރާތުން މާފުށީ ދާއިރާގެ މެންބަރު ހުސައިން ރިޒާ އާދަމް ހުށަހެޅުއްވި މި ބިލަކީ ގާނޫނުލްއުގޫބާތުގެ 515 ވަނަ މާއްދާއަށް އިސްލާހު ގެނައުމުގެ ބިލެވެ. މި ބިލުގައިވާ ގޮތުން، ރައީސުލްޖުމްހޫރިއްޔާ، ވަޒީރުން، މަޖިލިސް މެންބަރުން އަދި ފަނޑިޔާރުން ނުހައްގު މުއްސަނދިކަން ހޯދުމަކީ ޖިނާޔަތުގެ ދެވަނަ ދަރަޖައިގެ ކުށެކެވެ.

މި ކުށަށް ކަނޑައެޅިފައިވާ އަދަބަކީ 15 އަހަރަށް ޖަލަށްލުމެވެ. މީގެ އިތުރުން، ލިބުނު ފައިދާގެ ދެގުނަ ނުވަތަ އެއް މިލިއަން ރުފިޔާއިން ޖޫރިމަނާ ކުރެވޭނެއެވެ. އެހެން ފަރާތްތަކުން މި ކުށް ކޮށްފިނަމަ، އެއީ ޖިނާޔަތުގެ ތިންވަނަ ދަރަޖައިގެ ކުށެއްގެ ގޮތުގައި ކަނޑައަޅައި، އެންމެ ގިނަވެގެން 8 އަހަރަށް ޖަލަށްލުމާއެކު، ލިބުނު ފައިދާގެ ދެގުނަ ނުވަތަ ހަތަރުލައްކަ ރުފިޔާއިން ޖޫރިމަނާ ކުރެވޭނެ އެވެ.

މިއަދުގެ މަޖިލިސް ޖަލްސާގައި މި ބިލުގެ ފުރަތަމަ ކިޔުން ވަނީ އިއްވާފަ އެވެ.

ސަރުކާރުން މި އިސްލާހު ހުށަހަޅާފައިވަނީ މީގެކުރިން ރައީސްކަން ކުރައްވާފައިވާ ބޭފުޅުންނާއި، ވަޒީރުންނާއި ރައްޔިތުންގެ މަޖިލީހުގެ މެންބަރުންނާއި ފަނޑިޔާރުން ހިމެނޭގޮތުން، ދައުލަތުގެ މުވައްޒަފުންނާއި ދައުލަތުގެ މުވައްޒަފެއްގެ މަގާމު އަދާކޮށްފައިވާ މީހުން ހޯދަމުންދާ ނުވަތަ ހޯދާފައިވާ ނުޙައްޤު މުއްސަނދިކަމުގެ މައްސަލަތައް ބެލުން ފަސޭހަ ކުރުމުގެ ގޮތުންކަމަށް ބުނެފައިވެ އެވެ.