އެއްގަމުގައި ދުއްވާ އުޅަނދުތަކުގައި ބޭނުން ކުރަން ކުރިން ދޫކޮށްފައިވާ ޑޮމެއިން ނަންބަރުތައް އަލަށް ތައާރަފުކުރާ ޑޮމެއިންތަކަށް ބަދަލުކުރަން ދެ މަސްދުވަހުގެ މުއްދަތެއް ދޭން ސަރުކާރުން ނިންމައިފި އެވެ.

ޑޮމެއިން ނަންބަރުތައް ވިއްކުމުގެ "ވަގު ވިޔަފާރި"އެއް ހިންގާކަން ފަޅާއެރުމުން މިދިޔަ ސަރުކާރުން ވަނީ ޑޮމެއިން ނަންބަރުތައް ވިއްކާލުން ހުއްޓާލާފަ އެވެ.

ޓްރާންސްޕޯޓް މިނިސްޓްރީން މިއަދު ކުރި އިއުލާނެއްގައި ވަނީ ކުރިން ދޫކޮށްފައިވާ ޑޮމެއިން ބޭނުންކުރުމުގެ ހުއްދަ ނުވަތަ ފައިސާ ދެއްކިކަމުގެ ރަސީދު މިނިސްޓްރީއަށް ހުށަހަޅައިގެން އަލަށް ތައާރަފުކުރާ ޑޮމެއިންއަށް ބަދަލުކުރުމަށް ދެ މަސްދުވަހުގެ މުއްދަތެއް ލިބޭނެ ކަމަށެވެ. އަދި އަންނަ އާދިއްތަ ދުވަހުން ފެށިގެން އެ ކަމަށް އެދި ހުށަހެޅުމުގެ ފުރުސަތު ވަނީ ހުޅުވާލާފަ އެވެ. އެ މުއްދަތަށް ފަހު ޑޮމެއިންގެ ގޮތުގައި ބަލައިގަންނާނީ އަލަށް ތައާރަފުކޮށްފައިވާ ޑޮމެއިން ރަޖިސްޓްރީ ސެޓްފިކެޓާއި ހުއްދަ އެކަނި ކަމަށް އެ މިނިސްޓްރީގެ އިއުލާނުގައިވެ އެވެ.

އާ ޑޮމެއިންއަށް އެދި ހުށަހަޅަންޖެހޭނީ އެ ކަމަށް ކަނޑައަޅާފައިވާ ފޯމާ އެކު ޑޮމެއިން މަސައްކަތަށް ހާއްސަކޮށްފައިވާ މެއިލްއަށް ނުވަތަ ކައުންޓަރަށެވެ. ކައުންޓަރު ހުޅުވާފައި ހުންނާނީ ރަސްމީ ދުވަސްތަކުގައި ހެނދުނު 9 އިން މެންދުރު ފަހު 2 އަށް ކަމަށް އެ މިނިސްޓްރީން ބުންޏެވެ.

ރާއްޖޭގައި ގާތްގަނޑަކަށް 1،400 ޑޮމެއިން ގެންގުޅޭއިރު، އޭގެތެރެއިން ސައްހަ ނަންބަރުތަކުގެ ނިސްބަތަކީ 700 ނުވަތަ 50 ޕަސެންޓު ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވަނީ ވިދާޅުވެފަ އެވެ.

ޑޮމެއިން ހިދުމަތުގެ ސެކިއުރިޓީ ވަރުގަދަކޮށް ހަރުދަނާ ކުރުމުގެ ގޮތުން އާ ސަލާމަތީ ފިޔަވަޅުތަކާ އެކު ރަޖިސްޓްރީ ސެޓްފިކެޓާއި ޑޮމެއިން ބޭނުންކުރުމުގެ ހުއްދަ މި މަސް ތެރޭ އަލުން ތައާރަފުކުރާނެ އެ މިނިސްޓްރީން މިދިޔަ މަހު ބުނެފައިވެ އެވެ.