ޚިޔާލު ފާޅުކުރުމާއި ނޫސްވެރިކަމުގެ މިނިވަންކަމަށް ސަރުކާރުން ހުރަސް އަޅަނީ ވެރީންގެ ނާޤާބިލުކަމާއި ފަސާދައިގެ އަމަލުތައް ފަރުދާކުރަކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެެއްޖެ އެވެ.

ރައީސް މުހައްމަދު މުއިއްޒުގެ ސަރުކާރު އަޑީގައި އޮވެގެން މީޑިއާތަކާއި ނޫސްވެރިން ޖޫރިމަނާކުރެވޭ ބިލެއް ރައްޔިތުންގެ މަޖިލީހަށް ވަނީ ހުށަހަޅަަފަ އެވެ.

ނޫސްތަކާއި ނޫސްވެރިން ޖޫރިމަނާ ކުރެވޭ އެ ބިލްގައިވާގޮތުން އެ ގާނޫނުގެ ދަށުން ހަދާ ނޫސްވެރިކަމުގެ ސުލޫކީ މިންގަނޑާ ތަކުރާރުކޮށް ހިލާފުވާނަމަ 5000 ރުފިޔާ އާއި 50،000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެ އެވެ.މިކަމާއި ގުޅިގެން ޝާހިދު މިއަދު އެކްސްގައި ކުރެއްވި ޕޯސްޓެެއްގައި ވިދާޅުވީ ލޭ އޮހޮރުވައިގެން ހޯދި ޚިޔާލު ފާޅުކުރުމާއި ނޫސްވެރިކަމުގެ މިނިވަންކަން އޮބަހައްޓައި ތަޅު އެޅުވޭ ގޮތަށް ސަރުކާރުގެ ފަރާތުން މަޖިލީހަށް ބިލެއް ހުށަހެޅުމަކީ އިންތިހާ އަށް ކަންބޮޑުވާ ކަމެއް ކަމަށެވެ.

" އެފަދަ ބިލެއް ހުށަހެޅީ، ވެރީންގެ ނާޤާބިލުކަމާއި ފަސާދައިގެ ޢަމަލުތައް ފަރުދާކުރަން. ކޮންމެ ދުވަހެއްގައި ވެސް ފެނިގެން މިދަނީ ޚުދުމުޚްތާރުކަމުގެ ސިފަ" ޝާހިދު ވިދާޅުވި އެވެ.

ސަރުކާރުން މި ބިލް މަޖިލީހަށް ހުށަހެޅީ ތުޅާދޫ ދާއިރާގެ މެމްބަރު އަބްދުލްހަންނާން އަބޫބަކުރު ލައްވަ އެވެ. ހަންނާނަކީ ރައީސް މުއިއްޒުގެ ތާއީދާއެކު އަމިއްލަގޮތުން އިންތިހާބުވި މެމްބަރެކެވެ.އެ ބިލްގައިވާގޮތުން އެ ބިލް ގާނޫނަކަށްވުމާއެކު މީޑިއާ ކައުންސިލާއި ބްރޯޑްކާސްޓިން ކޮމިޝަން އުވި، މީޑިއާ އެންޑް ބްރޯޑްކާސްޓިން ކޮމިޝަނުގެ ނަމުގައި އާ ކޮމިޝަނެއް އުފެދޭނެ އެެވެ.