އިންތިހާބުވެ ވަޑައިގަތުމަށްފަހު ކުރީގެ ރައީސް އަބްދުﷲ ޔާމީން ގެކޮޅަށް ބަދަލުކުރަން އެދިވަޑައިގެންނެވި ކަމަށް ރައީސް މުހައްމަދު މުއިއްޒު ވިދާޅުވި ވާހަކަފުޅަކީ އިތުރުފުޅެއްކަން ހާމަވެއްޖެ އެވެ.

އެކަން ހާމަވީ ކުރީގެ ރައީސް އިބްރާހިމް މުހައްމަދު ސޯލިހު މިއަދު ރާއްޖެޓީވީގެ "ފަށާއިރު" ޕްރޮގްރާމްގައި ޕްރެޒެންޓަރު އާމިރު ސަލީމް ކުރެއްވި ސުވާލަކަށް ދެއްވި ޖަވާބުގަ އެވެ.

ރައީސް ސޯލިހު ވިދާޅުވީ ރިޔާސީ އިންތިހާބަށްފަހު ރައީސް ޔާމީން ގެކޮޅަށް ބަދަލުކުރަން އޭރުގެ އިންތިހާބީ ރައީސްގެ ގޮތުގައި ހުންނެވި ޑރ. މުއިއްޒު އަދި ރައްޔިތުންގެ މަޖިލީހުގެ މިހާރުގެ ރައީސް އަބްދުއްރަހީމް އަބްދުﷲ ވެސް އޭރު އެދިވަޑައިގެންފައިނުވާ ކަމަށެވެ.

ކުރިން ރައީސް މުއިއްޒު ވިދާޅުވެފައި ވަނީ އިންތިހާބު ކާމިޔާބުވެވަޑައިގަތުމުން އެންމެ ފުރަތަމަ ވެސް ރައީސް ސޯލިހުގެ އަރިހުން އެދިވަޑައިގަތީ ރައީސް ޔާމީން ގެކޮޅަށް ބަދަލުކޮށްދެއްވުމަށް ކަމަށެވެ. ނަމަވެސް ރައީސް ޔާމީން ވިދާޅުވެފައި ވަނީ ރައީސް މުއިއްޒު ޔާމީން މިނިވަންކުރަން އެދިވަޑައިގެންފައި ނުވާ ކަމަށެވެ.

މިކަމާ ގުޅިގެން ރައީސް ސޯލިހު ވިދާޅުވީ ރައީސް ޔާމީން ގެކޮޅަށް ބަދަލުކުރެއްވުމާ ގުޅޭ ގޮތުން ޔާމީން ވިދާޅުވީ ރަނގަޅަށް ކަމަށެވެ.

ފުރަތަމަ ކުރެވުނު މުއާމަލާތަކީ އިންތިހާބު ނިމުމަށްފަހު ސެޕްޓެންބަރު 30 ވަނަ ދުވަހުގެ ރޭގަނޑު 11:00 އާއި 12:00 ދެމެދު ރައީސް ސޯލިހު ކުރެއްވި ފޯނު ކޯލެއް ކަމަށާއި، އެ ކޯލުގައި މަރުހަބާ ވިދާޅުވެ ސުލްހަވެރިކަމާއެކު އިންތިގާލީ މަރުހަލާގެ ކަންކަން ކުރިއަށްގެންދިއުމާމެދު ވާހަކަދެއްކެވި ކަމަށެވެ. އެ ފޯނު ކޯލުގައި ވެސް ޔާމީން ގެކޮޅަށް ބަދަލުކުރުމާ ގުޅޭ ގޮތުން އެއްވެސް ވާހަކަފުޅު ރައީސް ދައްކަވާފައިނުވާ ކަމަށް ރައީސް ސޯލިހު ވިދާޅުވި އެވެ.

އޭގެ ފަހުން ޖެހިގެން އައި އޮކްޓޯބަރު އެއްވަނަ ދުވަހުގައި ރައީސް މުއިއްޒާ ރައީސް އޮފީހުގައި ބައްދަލުކުރެއްވި ކަމަށާއި، ބައްދަލުވުމަށް ވަޑައިގަތީ ރައީސް މުއިއްޒާއި މަޖިލީހުގެ ރައީސް އަބްދުއްރަހީމް ކަމަށާއި އެ ބައްދަލުވުމުގައި ވެސް ވާހަކަދެކެވުނީ އިންތިގާލީ މަރުހަލާއާ ގުޅޭ ގޮތުން ކަމަށް ރައީސް ސޯލިހު ވިދާޅުވި އެވެ.

"އެ ބައްދަލުވުމުގެ ތެރެއިން ރައީސް މުއިއްޒު އަރިހުގައި ރައީސް ޔާމީން ގެކޮޅަށް ގެނައުމުގެ މަސައްކަތް ފަށާފައިވާ ކަމަށާއި، ލޯންޗަށް މިހާރު އަރާވަޑައިގަންނަވާނެ ކަމަށާއި، އެމަނިކުފާނު ވަޑައިގަންނަވާތަނަށް އެ ބޭފުޅުން ވަޑައިގަންނަވަންވީ ނޫންތޯ ސުވާލުކުރުމުން އެ ދެބޭފުޅުންނަށް ލިބިވަޑައިގަތީ ހައިރާންކަމެއް،" ސޯލިހު ވިދާޅުވި އެވެ.

ސޯލިހު ވިދާޅުވީ ރިޔާސީ އިންތިހާބަށް އަހަރެއްހާ ދުވަސް ކުރިން ރައީސް މުއިއްޒު ޔާމީން މިނިވަން ކުރެއްވުމަށް އެދި މެސެޖެއް ކުރެއްވި ކަމަށެވެ. ނަމަވެސް އޭގެ ފަހުން ޕީޕީއެމް/ޕީއެންސީ އެއްވެސް ބޭފުޅެއްގެ މެސެޖެއް އެކަމާ ގުޅިގެން ލިބިވަޑައިގެންފައިނުވާ ކަމަށް ރައީސް ސޯލިހު ވިދާޅުވި އެވެ.

ރައީސް ޔާމީން މި ވާހަކަ ދެއްކެވުމުން ޕީއެންސީގެ ލީޑަޝިޕުން ވަނީ އެކަން ދޮގުކޮށް ރައީސް އެކަމަށް ފޮނުއްވި މެސެޖްތައް އެބަހުރި ކަމަށް ބުނެފައިވެ އެވެ. ނަމަވެސް މިހާތަނަށް އެ މެސެޖްތައް ހާމަކޮށްފައެއް ނުވެ އެވެ.