ގެދޮރުވެރިޔާ ސްކީމުގެ ދަށުން ދޫކުރުމަށް ހަމަޖެހިފައިވާ 4،000 ފްލެޓުގެ ލިސްޓު އާންމުކުރުން ލަސްވާތީ ނުރުހުން ފާޅު ކުރުމަށް ބަޔަކު ހައުސިން މިނިސްޓްރީއަށް ދިއުމުން މައްސަލަ ގޯސްވެއްޖެ އެވެ.

މިއަދު ހައުސިން މިނިސްޓްރީއަށް ދިޔަ މީހުން އެދެމުން ދިޔައީ ހައުސިން މިނިސްޓަރު އަލީ ހައިދަރުއާ ބައްދަލު ކުރުމަށެވެ. ނަމަވެސް އެއްވި މީހުންނާ މިނިސްޓްރީގެ އެއްވެސް އިސް އޮފިޝަލަކު ބައްދަލު ނުކުރިކަމަށް އެކަމުގައި ބައިވެރިވި މީހަކު "ހުރިހާ" އަށް މައުލޫމާތު ދިނެވެ.

މި ސަރުކާރުގެ ފެއިލްވެފައިވާ ބޯހިޔާވަހިކަމުގެ ވައުދާއި ގުޅިގެން އެތައް ބަޔަކު ދަނީ ސަރުކާރަށް ނުރުހުން ފާޅުކުރަމުންނެވެ. ރީއިވަލުއޭޓު ކުރުމަށް އޭސީސީން ފުލެޓް ލިސްޓް އާންމުކުރުން ހުއްޓުވާ ހައުސިން މިނިސްޓްރީ އާ ހަވާލުކުރިފަހުން އެތައް ދުވަހެއް ވީއިރުވެސް ފުލެޓު ލިސްޓް ވަނީ އާންމު ނުކުރެވި އެވެ.

ނުރުހުން ފާޅުކޮށް މިނިސްޓްރީގެ ގޯތި ތެރެއަށް ވަތް މީހުން ކޮންޓްރޯލުކުރުމަށް ފުލުހުންވެސް ހަރަކާތްތެރިވެފައިވެ އެވެ.

ހައުސިން މިނިސްޓްރީގެ މުވައްޒަފަކާއި އެތަނަށް އެއްވެ ތިބި އާންމުންގެ ބަޔަކާއި ދެމެދު ހަމަނުޖެހުންތަކެއް ހިނގި މަންޒަރުފެންނަ ވީޑިއޯއެއްވެސް ސޯސަލް މީޑިއާގައި ދަނީ ދައުރުވަމުންނެވެ.

މިނިސްޓަރު ހައިދަރު ކުރިން ވިދާޅުވީ ހަފްތާ ފެށޭ ދުވަހުގެ ކުރީ ދުވަހު (އިއްޔެ) ފްލެޓު ލިސްޓު އާންމު ކުރާނެ ކަމަށެވެ. ނަމަވެސް އިއްޔެ ވަނީ ފްލެޓު ލިސްޓު އާންމު ކުރުން މުއްދަތެއް ނެތް ގޮތަށް ފަސްކޮށްފައި އެވެ.