ރޭން ފެށިގެން ވެހެމުންދާ ވާރޭގައި މާލޭގައި ފެން ބޮޑުވެއްޖެ އެވެ.

މިއަދު ރާއްޖޭގެ ބޮޑު ބަޔަކަށް މޫސުން ގޯސްވެ، ބައެއް ސަރަހައްދު ތަކަށް ބޯކޮށް ވާރޭ ވެހޭނެ ކަމަށް މޫސުމާބެހޭ ގައުމީ އިދާރާ، މޯލްޑިވްސް މީޓިއޮރޮލޮޖިކަލް ސާވިސްއިން ވަނީ ލަފާކޮށްފަ އެވެ.

އެ ގޮތުން މާލެ ސަރަހައްދަށް ދަނީ ވަރަށް ބޯކޮށް ވާރޭ ވެހެމުންނެވެ. މިއާއެކު މާލޭގެ ގިނަ މަގުތަކުގައި ފެންބޮޑުވެ ހިނގާބިނގާވެ އުޅުމަށް ވަނީ ދަތިވެފަ އެވެ.

ރާއްޖޭގެ އެކި ހިސާބުތަކަށް ވިއްސާރަ ކުރުމާއެކު ގުގުރާނެ ކަމަށާއި، ދެކުނާއި މެދުރާއްޖެތެރޭގެ ބައެއް ރަށްތަކަށް ބޯކޮށް ވާރޭ ވެހޭނެ ކަމަށް މެޓް އޮފީހުން ވަނީ ބުނެފަ އެވެ.

މެޓް އޮފީހުން ވަނީ ބ. އަތޮޅުން ފެށިގެން ވ. އަތޮޅާއި ހަމައަށް މިއަދު 8:50 އިން ފެށިގެން މެންދުރު 1:00 އާ ހަމައަށް ރީނދޫ ސަމާލު ނެރެފަ އެވެ. ބޯކޮށް ވާރޭވެހި ގުގުރުމާއެކު ވިލާ ގަނޑުގައި 45 މޭލަށް ވައިގަދަވެ ކަނޑުތައް ގަދަވާނެކަމަށް އެ އިދާރާއިން ލަފާކޮށްފައިވެ އެވެ.

މީގެ އިތުރުން އޭގެ ކުރިންވަނީ ބ. އަތޮޅުން ފެށިގެން އދ. އަތޮޅާ ހަމައަށް ވަނީ ހުދު އެލާޓު ވެސް ނެރެފަ އެވެ. މެޓް އޮފީހުން ނެރެފައިވާ އެލާޓުގައި ވާގޮތުން މިއަދު މެންދުރު 1:30 އާ ހަމައަށް، މި އަތޮޅުތަކަށް ގުގުރުމާއެކު ބޯކޮށް ވާރޭވެހޭނެކަމަށް ލަފާކޮށްފައިވެ އެވެ.

ދެކުނުގެ އަތޮޅުތަކަށް ގަޑިއަކު 5 މޭލާއި 15 މޭލުގައި ވައި ޖެހޭނެކަމަށާއި އެހެން ހިސާބުތަކަށް 3 މީލާއި 13 މޭލުގައި ވައިގަދަވާނެކަމަށް މެޓު އޮފީހުން ބުނެ އެވެ.