ރައީސުލްޖުމްހޫރިއްޔާ މުހައްމަދު މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދު އިނގިރޭސިވިލާތުގައި އޮންނަ ކައިވެނި ހަފްލާއެއްގައި ބައިވެރިވެވަޑައިގަތުމަށް ރޭ އިނގިރޭސިވިލާތައް ފުރާވަޑައިގެންފި އެވެ.

ރައީސްގެ ދެކަނބަލުން ނުރަސްމީ ދަތުރުފުޅެއްގައި ފުރާވަޑައިގެންވިކަން ރައީސް އޮފީހުން ހާމަކުރިނަމަވެސް. ދަތުރުފުޅާއި ގުޅޭ އިތުރު ތަފްސީލު ހާމަކޮށްފައިނުވެ އެވެ.

"ހުރިހާ" އަށް އެނގިފައިވާގޮތުގައި ރައީސްގެ ދެކަނބަލުން އިނގިރޭސިވިލާތައް ވަޑައިގަންނަވަނީ އެ ގައުމުގެ މެންޗެސްޓާ ގައި ދިރިއުޅޭ ދިވެހި އާއިލާއެއްގެ ކައިވެނީގެ ހަފްލާއަކަށެވެ.

ރައީސް އޮފީހުން ބުނީ މި ދަތުރުފުޅުގައި، ރައީސް ކުރައްވާ އިދާރީ މަސައްކަތްޕުޅުތަކުގެ ހަރަދާއި، އާއިލާއާއި އަމިއްލަފުޅު ކަންކަންވެސް ހިމެނޭގޮތުން، މުޅި ދަތުރުފުޅުގެ ހުރިހާ ހަރަދެއްވެސް ކުރައްވާނީ ރައީސުލްޖުމްހޫރިއްޔާ އަމިއްލަފުޅަށް ކަމަށެވެ.