އައިޖީއެމްއެޗްގައި މަސައްކަތްކުރި ނަރުހަކު މަރާލުމުގައި ބައިވެރިވިކަމުގެ ދައުވާލިބޭ ހަލީމަތު ލަމްހާ ބަންދުން ދޫކޮށްލި މައްސަލަ ބަލައިނުގަތުމަށް ހައި ކޯޓުން ނިންމައިފި އެވެ.

އޮކްޓޫބަރު 2021 ގައި އައިޖީއެމްއެޗްގައި މަސައްކަތްކުރި ފިލިޕީންސްގެ ނަރުހެއް ކަމަށްވާ މޭރީ މަރާލި މައްސަލާގައި ދައުލަތުން ދައުވާކުރަނީ މޭރީގެ ފިރިމީހާ މާވިން އެސްވައިގެ މައްޗަށެވެ. އަދި ލަމްހާގެ މައްޗަށް ކުރަނީ އޭނާ މަރާލުމުގައި ބައިވެރިވުމުގެ ދައުވާ އެވެ.

އެ ދެ މީހުންނަށް ތުހުމަތު ކުރަނީ އެ މީހުން ލޯބީގެ ގޮތުން އުޅުމުގެ ތެރޭގައި މޭރީ މަރާލި ކަމަށް ބުނެ އެވެ. ނަމަވެސް މި މަހު ކުރީކޮޅު ކްރިމިނަލް ކޯޓުން ވަނީ ޝަރުތުތަކާއެކު ލަމްހާ ބަންދުން ދޫކޮށްލަން އަމުރުކޮށްފަ އެވެ.

އެ މައްސަލަ އިސްތިއުނާފްކުރަން ދައުލަތުން ހައި ކޯޓަށް ހުށަހެޅުމުން އެ ކޯޓުގެ ރަޖިސްޓްރާގެ ނިންމުމުގައި ވަނީ ކްރިމިނަލް ކޯޓުގެ ނިންމުމުގެ ތެރެއަށް ހައި ކޯޓުން ވަންނަން ޖެހޭ ހާލަތެއް އެ މައްސަލާގައި ދައުލަތަށް ބުނެދެވިފައި ނުވާތީ އެ މައްސަލަ ބަލައިނުގަތުމަށް ނިންމީ ކަމަށެވެ.

އެ މައްސަލާގައި ލަމްހާ ދޫކޮށްލި ނަމަވެސް މާވިން އަދިވެސް ހުރީ ބަންދުގަ އެވެ.

ހައި ކޯޓުން އިއްޔެ ވެސް ވަނީ މީހަކު މެރުމުގެ ތުހުމަތުވާ މީހަކު ބަންދު ނުކުރަން ނިންމައިފަ އެވެ.