"ގާނޫނުއަސާސީގެ ދިފާއުގައި ރައްޔިތުންގެ" ނަމުގައި އަންނަ ޑިސެމްބަރު 10 ވަނަ ދުވަހު ބޮޑު ޖަލްސާއެއް ބާއްވަން އިދިކޮޅު އެމްޑީޕީން ނިންމައިފި އެވެ.

އެ ޖަލްސާގައި ބައިވެރިވުމުގެ ދައުވަތު ރާއްޖޭގެ ހުރިހާ ރަށެއްގައި ދިރިއުޅޭ އެ ޕާޓީގެ ސަޕޯޓަރުންނަށް ވަނީ ދީފަ އެވެ.

އެމްޑީޕީގެ ޗެއާޕާސަންގެ ނައިބު އިބްރާހީމް ވަހީދު (އިބުރޭ) ވިދާޅުވީ އެ ޖަލްސާ ބާއްވަނީ އަލިމަސް ކާނިވަލް ސަރަހައްދުގައި ކަމަށެވެ.

އޭނާ ވިދާޅުވީ އެ ޖަލްސާއަކީ ގިނަ ބައެއްގެ މަސައްކަތުން ހޯދި ޑިމޮކްރަސީ އާއި އިންސާނީ ހައްގުތައް މި ސަރުކާރުން ނިގުޅައިގަންނަމުން ދާތީ އެކަމާ ދެކޮޅަށް އަޑުއުފުލަން ބާއްވާ ޖަލްސާއެއް ކަމަށެވެ.

އެ ޖަލްސާއަކީ ނިމިދިޔަ ރިޔާސީ އިންތިހާބަށްފަހު އެ ޕާޓީން ކާނިވާ ސަރަހައްދުގައި ބާއްވާ އެންމެ ފުރަތަމަ ބޮޑު ޖަލްސާ އެވެ.

އެމްޑީޕީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ނާޒިލް ވިދާޅުވީ އެ ޖަލްސާގައި ބައިވެރިވުމުގެ ދައުވަތު ރާއްޖޭގެ ހުރިހާ ރައްޔިތުންނަށް އަރުވާ ކަމަށެވެ. މަސްވެރިންނާއި ރިސޯޓުތަކުގައި މަސައްކަތްކުރާ މުވައްޒަފުންނަށް އެ ޖަލްސާގައި ބައިވެރިވުމަށް ހާއްސަ ދައުވަތެއް އަރުވާ ކަމަށް އޭނާ ވިދާޅުވި އެވެ.