ބޮލީވުޑްގައި ގިނަ ކާމިޔާބީތަކެއް ހޯދަމުން އަންނަ އެކްޓަރު ވިކްރާންތު މެސީ އުމުރުން އެންމެ 37 އަހަރުގައި ކުއްލި ގޮތަކަށް ބޮލީވުޑުން ރިޓަޔާ ކުރިކަން އިއުލާން ކޮށްފި އެވެ.

މިދިޔަ ހޯމަ ދުވަހު ވިކްރާންތުގެ އިންސްޓަގްރާމްގައި ހިއްސާކުރި ޕޯސްޓެއްގައި އޭނާ ބުނެފައިވަނީ ފާއިތުވި އަހަރުތަކަކީ އޭނާގެ ހަޔާތުގައި ވަރަށް ހާއްސަ އަހަރުތަކެއް ކަމަށާއި އެހެން ނަމަވެސް މިހާރު ބޭނުންވަނީ އާއިލާއަށް ވަގުތު ދޭން ކަމަށެވެ.

އެހެން ކަމުން އެންމެ ފަހު ފަހަރަށް 2025 ވަނަ އަހަރު ބައްދަލުވާނެ ކަމަށާއި އޭގެ ފަހުން ދެން އޭނާ ފެންނާނެ ދުވަހެއް ނޭނގޭ ކަމަށް ވެސް ވިކްރާންތު ބުނެފައިވެ އެވެ.

https://www.instagram.com/p/DDDPEs0zd9s/?utm_source=ig_embed&ig_rid=4b1b0317-907a-45cb-8f5d-4c3a4e7d59dd

އެއާއެކު ވިކްރާންތު ވަނީ ބޮލީވުޑްގައި އޭނާ ހޭދަކުރި ދުވަސްތަކުގައި އާއްމުންގެ ފަރާތުން ލިބުނު ލޯތްބާއި މަގުބޫލުކަމަށް ޝުކުރު އަދާކޮށްފަ އެވެ.

ބޮލީވުޑްގައި ކާމިޔާބީއަށްފަހު ކާމިޔާބެއް ލިބެމުން ދަނިކޮށް އެ ދާއިރާ ދޫކޮށްލަން ވިކްރާންތު ނިންމި ނިންމުމަކީ ޕަބްލިސިޓީ ސްޓަންޓެއް ކަމަށް ވެސް ބައެއް މީހުން އަންނަނީ ބުނަމުންނެވެ.

2013 ވަނަ އަހަރު ބޮލީވުޑަށް ތައާރަފްވި ވިކްރާންތުގެ ފާހަގަކޮށްލެވޭ ފިލްމުތަކުގެ ތެރޭގައި "ޓުވެލްވްތު ފެއިލް"، "ސެކްޓާ 36" އަދި "ސަބަރްމަތީ ރިޕޯޓް" ހިމެނެ އެވެ.