ހުޅުމާލޭ ދެވަނަ ފިޔަވަހީގައި ތަރައްގީކޮށްފައިވާ ހިޔާ ފްލެޓުތަކުގައި އިތުރު ލިފްޓު ހަރުކުރުމަށް ލިފްޓު ގަންނަން 18 މިލިއަން ޑޮލަރު ހޭދަވެފައިވާ ކަމަށް ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ) އިން ބުނެފި އެވެ.

ހިޔާ ފްލެޓުތަކުގައި އިތުރު ލިފްޓު ހަރުކުރުމަށް މި އަހަރަށް ލަފާކޮށް ފާސްކުރި ބަޖެޓުގައި 200 މިލިއަން ރުފިޔާ ހިމަނައިފައިވާއިރު، ހިޔާ ޓަވަރުތަކުގައި އިތުރު ލިފްޓު ހަރުކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ.

ރައްޔިތުންގެ މަޖިލީހުގެ މާލިއްޔަތު ކޮމެޓީގައި އިދިކޮޅު އެމްޑީޕީ އަށް ނިސްބަތްވާ ހަނދިމާދޫ ދާއިރާގެ މެންބަރު އަބްދުލް ގަފޫރު މޫސާ ކުރެއްވި ސުވާލަކަށް ޖަވާބު ދެއްވަމުން އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ވިދާޅުވީ، ހިޔާގެ 16 ޓަވަރުގައި ހަރުކުރުމަށް 32 ލިފްޓު ގަތުމަށް 18 މިލިއަން ޑޮލަރު ހަރަދުކޮށްފައިވާ ކަމަށެވެ.

އެ ލިފްޓުތައް ހަރުކުރުމުގެ މަސައްކަތް މިހާރު ފެށިގެން ކުރިއަށް ދާއިރު މަސައްކަތަށް ހޭދަވަނީ ކިހާ ފައިސާ އެއް ކަމެއް ފަޒުލް ހާމައެއް ނުކުރެ އެވެ.

ޗައިނާގެ ޝެންޔަންގް ޔުއާން އިންޓެލެކްޗުއަލް ގުރޫޕާ ހަވާލުކޮށްގެން ކުރިއަށް ގެންދާ މި މަސައްކަތް ފެށީ އޭޕްރީލް މަހުގެ 18ގައި އެވެ. އެއީ އެއް އަހަރު ދުވަހުގެ ތެރޭ މަސައްކަތް ނިންމާ ހަވާލުކުރާ ގޮތަށެވެ.

އިތުރު ލިފްޓު ހަރުކުރުމުގެ މަޝްރޫއުގެ ދަށުން ކޮންމެ ޓަވަރެއްގައި ދެ ލިފްޓް ހަރުކުރެއެވެ. ޖުމްލަ 32 ލިފްޓް ހަރުކުރާއިރު، އެއީ ކޮންމެ ފްލެޓަކަށް އިތުރު ޕެސެންޖާ އަދި ސްޓްރެޗާ ލިފްޓެކެވެ.