ސީރިއާގައި ބައިގަރުނުވީ ބައްޝަރުލް އަސަދުގެ ވެރިކަން ނިމިއްޖެކަމަށް ސަރުކާރާ ދެކޮޅު ހަނގުރާމަވެރިންގެ ކޯލިޝަނުން މިއަދު އިއުލާނުކޮށްފި އެވެ.

ބައްޝާރުގެ ވެރިކަމާ ދެކޮޅަށް ހަނގުރާމަކުރާތާ 13 އަހަރު ފަހުން އޭނާގެ ވެރިކަން ބަދަލުކޮށްފައި މިވަނީ އިދިކޮޅު ހަނގުރާމަވެރިން ފާއިތުވި ދިހަ ވަރަކަށް ދުވަހު ހޯދަން ފެށި ކުރިއެރުންތަކާ އެކުގަ އެވެ.

ސީރިއާގެ މުހިންމު ސިޓީތައް ހިފަމަށްފަހު މިއަދު ވެރިރަށް ދިމިޝްގަށް ވަނުމާއެކު ސިފައިން ވަނީ މަގާމުތައް ދޫކޮށް ގޮސްފަ އެވެ.

ސިރިޔާގެ ރައީސް ބައްޝާރުލް އަސަދު އާދީއްތަ ދުވަހު ދިމިޝްގެ ދޫކޮށް ފުރާވަޑައިގެންފި ކަމަށް ސިފައިންގެ ދެ އިސް އޮފިސަރުންނާއި ހަވާލާދީ ރޮއިޓާސްއިން ރިޕޯޓްކޮށްފައިވެ އެވެ.

ސީރިޔާގެ އިދިކޮޅު ހަނގުރާމަވެރިން ވަނީ ރޭގެ ވަގުތެއްގައި ދިމިޝްގަށް ވަދެގަނެފަ އެވެ. މިއާއެކު ދިމިޝްގުގެ މައި މައިދާނަކަށް އެއްވެ، އެތައް ބަޔަކު ދިޔައީ "މިނިވަންކަން" ގޮވަމުންނެވެ.

ހަނގުރާމަވެރިން ބުނެފައިވަނީ ސެދްނާޔާ ޖަލުގައި އަސަދުގެ އަނިޔާވެރިކަން ލިބެމުން ދިޔަ އެތައް ބަޔަކު މިނިވަން ކުރަން ނިންމާފައިވާކަމަށެވެ. ސެދްނާޔާއަކީ ދިމިޝްގްގެ ބޭރުގައި ހުންނަ ބޮޑު ސިފައިންގެ ޖަލެކެވެ. މިތަނުގައި ސިރިޔާ ސަރުކާރުން އެތައްބަޔަކު ބަންދުކޮށްފައި ބޭތިއްބި އެވެ.

ވެރިރަށުގެ ދެކުނު ހުޅަނގު ފަރާތު ރަށްފުށުގެ ސަރަހައްދުތަކުގައި، ސަރުކާރުގެ ބާރު ގެއްލުމާ ގުޅިގެން، ޒުވާނުންނާއި ކުރީގެ ހަނގުރާމަވެރިން އަސަދު ޢާއިލާގެ އަނިޔާވެރި ވެރިކަމާ ދެކޮޅަށް މަގުމައްޗަށް ނުކުމެ އިހުތިޖާޖުކުރަން ވަނީ ފަށާފަ އެވެ.

ސީރިއާގެ ރައީސް ބައްޝާރުލް އަސަދުގެ 24 އަހަރުވީ ވެރިކަން ބަދަލުކުރުމަށް އެގައުމުގައި ކުރަމުންދާ ހަނގުރާމައިގައި އިދިކޮޅު ހަނގުރާމަވެރިން މިވަނީ ކުއްލިއަކަށް ސީރިއާގެ މުހިއްމު ގިނަ ސިޓީތަކެއް އެމީހުންގެ އަތްދަށަށް ގެންގޮސްފަ އެވެ.

އޭގެ ތެރޭގައި މުހިންމު ސިޓީއެއް ކަމުގައިވާ ހޮމްސްއަށް އިއްޔެގެ ވަގުތެއްގައި ހަނގުރާމަވެރިން ވަނީ ވަދެފަ އެވެ. ހޮމްސް ސިޓީ ހިފުމަކީ 13 އަހަރު ދިގު މި ހަނގުރާމައިގައި ހަނގުރާމަވެރިންނަށް ލިބުނު އެންމެ ބޮޑު ކުރިއެރުމެކެވެ. އަހަރުތަކެއް ކުރިން އިދިކޮޅު ހަނގުރާމަވެރިންނާއި ސީރިޔާގެ ސިފައިންނާ ދެމެދު ހިނގި ވަރުގަދަ ހަނގުރާމައިގައި ހޮމްސްގެ ބޮޑު ބައެއް ހަލާކުވެ ވީރާނާވެފައިވެ އެވެ.

ސިރިޔާގެ އިދިކޮޅު ހަނގުރާމަވެރިންގެ ކޮމާންޑަރު ހަސަން އަބްދުލް ޣަނީ އާދީއްތަ ދުވަހުގެ ފަތިހު ނެރުނު ބަޔާނެއްގައި ބުނެފައިވަނީ ދިމިޝްގު ވަށައިގެންވާ ހަނގުރާމަވެރިން ހަރަކާތްތެރިވަމުން ދާކަމަށެވެ.