ދިރާގަށް 2024 ވަނަ އަހަރުގެ ޝަރަފުވެރި ޕައިޕްލައިން އެވޯޑްސްގައި 'އިނޮވޭޝަން އިން ޑިޖިޓަލް ޓްރާންސްފޯމޭޝަން' އެވޯޑް ލިބިއްޖެ އެވެ.

ދިރާގަށް މި އެވޯޑް ލިބިފައިވަނީ އެތިޔާއާ އެކު ކުރިއަށް ގެންދިޔަ އެކުންފުނިން ކަސްޓަމާ ރިލޭޝަންޝިޕް މެނޭޖްމެންޓް (ސީއާރްއެމް) ޓްރާންސްފޮމޭޝަން ޕްރޮޖެކްޓަށެވެ.

މި އެވޯޑަކީ ދިރާގުން ކަސްޓަމަރުންގެ ތަޖުރިބާތައް އިތުރަށް ފުރިހަމަކޮށް، އޮޕަރޭޝަންތައް ސްޓްރީމްލައިންކުރުމަށް ޒަމާނީ ޓެކްނޮލޮޖީ ގެނައުމަށް ކުރާ މަސައްކަތުގެ އަގު ވަޒަންކުރުމުގެ ގޮތުން އެކުންފުންޏަށް ދެވުނު އެވޯޑެކެވެ. އެތިޔާގެ ބިޒްނަސް ސަޕޯޓް ސިސްޓަމް (ބީއެސްއެސް) ޕްލެޓްފޯމްގެ އެހީގައި ކުރިއަށްގެންދިޔަ މި ޕްރޮޖެކްޓަކީ ކަސްޓަމަރުންނާ ގުޅުން ބަދަހިކޮށް، އެފަރާތްތަކަށް ކުރިއަށް ވުރެ ރަނގަޅު ފެންވަރުގެ ހިދުމަތް ދިނުމަށް ކުރާ މަސައްކަތަށް ލިބުނު ވަރަށް ބޮޑު ކުރިއެރުމެކެވެ.

"ޑިޖިޓަލް އިނޮވޭޝަން ކުރިއަރުވަން މަސައްކަތްކުރާ ފަރާތްތަކަށް ހާއްސަކޮށްފައިވާ މި އެވޯޑް ލިބުމަކީ އަޅުގަނޑުމެންނަށް ލިބޭ ވަރަށް ބޮޑު ޝަރަފެއް. މި ކާމިޔާބީން ދައްކުވައިދެނީ އަޅުގަނޑުމެންގެ ހީވާގި ޓީމާއި ޕަރޓްނަރުންގެ ބުރަ މަސައްކަތާއި އެއްބާރުލުން،" ދިރާގުގެ ސީޓީއައިއޯ، މުހައްމަދު މުއްސަދު ވިދާޅުވި އެވެ.

"ޑިޖިޓަލް މާހައުލުގައި ކުރިއަރަމުން އަންނައިރު، އަޅުގަނޑުމެންގެ އުއްމިދަނީ ތަފާތު ޓެކްނޮލޮޖީގެ ޒަރިއްޔާއިން ދިވެހިރާއްޖޭގައި އުޅޭ ފަރާތްތަކުގެ ދިރިއުޅުން މުއްސަނދިކޮށް، މުޖުތަމައުތައް ބާރުވެރި ކުރުވުމަށް،"

ޕައިޕްލައިން އެވޯޑްސްއަކީ ޑިޖިޓަލް އީޖާދުތައް ގެނައުމުގައި އިސް ސަފުގައި ހަރަކާތްތެރިވާ ފަރާތްތައް ފާހަގަކުރާ ބައިނަލްއަގްވާމީ އެވޯޑެކެވެ. އަދި މި އެވޯޑް ދިރާގަށް ލިބުމަކީ އެކުންފުނިން މިހާރަށްވުރެ ހަރުދަނާ، މުވާސަލާތީ ގޮތުން އިތުރަށް ގުޅިފައިވާ މުސްތަގުބަލެއް ބިނާކުރުމަށް ގެންގުޅޭ ދެމެހެއްޓެނިވި ވިސްނުމުގެ ހެއްކެކެވެ.

ދިރާގުން ވަނީ ޕައިޕްލައިން އެވޯޑްސްއިން މި ލިބުނު އެވޯޑްގެ އަގުވަޒަންކޮށް، މި އިންގިލާބީ ދަތުރުގައި ދިރާގާ އެކު މަސައްކަތްކުރި ހުރިހާ ޕަރޓްނަރުންނާއި މުވައްޒަފުންނަށް ވަރަށް ހާއްސަ ޝުކުރެއް އަދާކޮށްފަ އެވެ. އަދި އެކުންފުނިން އަބަދުވެސް މަސައްކަތްކުރަމުން ދަނީ ޑިޖިޓަލް ގޮތުން ރާއްޖޭގެ ކުރިއެރުވުމަށް މަސައްކަތްކުރަމުންނެވެ.