ބުރާސްފަތި ދުވަހު ހިނގި އަލިފާނުގެ ހާދިސާގައި ބޭނުން ނުކުރެވޭވަރަށް އެނދި ތިން މިނިސްޓްރީގެ މަސައްކަތް ދަރުބާރުގޭގައި މިއަދު ފަށައިފި އެވެ.

ދަރުބާރުގޭގައި ހިދުމަތް ދޭން ފަށާފައިވަނީ ހައުސިން މިނިސްޓްރީއާއި ކޮންސްޓްރަކްޝަން މިނިސްޓްރީއާއި އެންވަޔަރަމަންޓް މިނިސްޓްރީގެ އިތުރުން އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) އެވެ.

އެ ހަތަރު އިދާރާގެ މަސައްކަތަށް ދަރުބާރުގޭގައި ވަނީ ވަގުތީ އޮފީސް ހަދާފަ އެވެ. ހަފުތާ ބަންދުގައި ދަރުބާރުގޭގައި ވަގުތީ އޮފީސް ބައިތައް ތައްޔާރުކުރުމަށް މަސައްކަތްކޮށްފައިވަނީ ސަރުކާރު މުވައްޒަފުންނާއި ސަރުކާރު ހިއްސާވާ ކުންފުނިތަކުގެ މުވައްޒަފުންނެވެ.

ބުރާސްފަތި ދުވަހު ހިނގި އަލިފާނުގެ ހާދިސާގައި ފުރަތަމަ ރޯވެފައިވަނީ ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ ހިންގާ އިމާރާތުގައި އެވެ. އޭގެ ފަހުން އެންވަޔަރަމަންޓް މިނިސްޓްރީ ހިންގާ ގްރީން ބިލްޑިން ގައިވެސް ވަނީ ރޯވެ އަނދާފަ އެވެ. އީޕީއޭ ހިންގަމުން ދިޔައީ އެ މިނިސްޓްރީގަ އެވެ.

ރޯވި އިރު ހައުސިން މިނިސްޓްރީ އިމާރާތުގައި ސިޓީ ކައުންސިލުގެ ބައެއްވެސް ހިންގަމުން ދިޔަ އެވެ. އެ މަސައްކަތް ސިޓީ ކައުންސިލުން ވަނީ ހުޅުމާލެއަށް ބަދަލުކޮށްފަ އެވެ.

ފުލުހުން ގެންދަނީ މި އަލިފާނުގެ ހާދިސާ ހިނގަން މެދުވެރިވި ސަބަބު ތަހުގީގު ކުރުމުންނެވެ. އެ ތަހުގީގުގައި ބޭރުގެ ތަޖުރިބާކާރުންގެ އެހީ ހޯދުމަށް ނިންމާފައިވާކަމަށްވެސް ފުލުހުން ބުންޏެވެ.