ދުނިޔޭގެ ދެ ބައްރުގައިވާ އެމެރިކާގެ ނިއުޔޯކުން އިނގިރޭސި ވިލާތުގެ ލަންޑަނަށް 54 މިނެޓުން ދިއުމަކީ މުސްތަގުބަލުގައި ކުރެވޭނެ ކަމެއް ކަމަށް ދުނިޔޭގެ އެންމެ މުއްސަނދި މީހާ އިލަން މަސްކް ބުނެފި އެވެ.

އެންމެ ބޮޑު ދެ ބައްރު ގުޅުވައިދޭ ބިމުއަޑީގެ މަގެއް ތަރައްގީ ކުރުމުގެ ވާހަކަތައް ދެކެވެމުން އަންނަތާ އަހަރުތަކެއް ވެފައިވީ ނަމަވެސް މިހާތަނަށް އެއަށް އަމަލީ އެއްވެސް ކުރިއެރުމެއް ލިބިފައެއް ނުވެ އެވެ. އެހެން ނަމަވެސް އެންމެ ފަހުން އިލަން މަސްކް މިވަނީ މިއީ ހަގީގަތަކަށް ވެދާނެ ކަމެއް ކަމުގެ ފެހި ސިގްނަލް ދީފަ އެވެ. އެގޮތުން އޭނާގެ އަމިއްލަ ކުންފުނި ބޯރިން ކޮމްޕެނީއިން 20 ބިލިއަން ޑޮލަރަށް އެ މަގު ތައްޔާރު ކުރެވޭނެ ކަމަށް އިލަން ބުނެފައިވެ އެވެ.

މީގެ ކުރިން އެ މަޝްރޫއުއަށް 20 ޓްރިލިއަން އެމެރިކާ ޑޮލަރު ހޭދަވާނެ ކަމަށް ބެލެވުނު ނަމަވެސް އިލަން ބުނެފައިވަނީ އެއަށްވުރެ 1000 ގުނަ ކުޑަ އަގަކަށް އެކަން ކުރެވިދާނެ ކަމަށެވެ.

ދުނިޔޭގެ އެންމެ ތަރައްގީ ވެފައިވާ ދެ ސިޓީ ގުޅުވައިދޭ އެ މަގަކީ 3400 މޭލު ދިގު ސުޕަ ފާސްޓް ރޭލުތަކަށް ދަތުރު ކުރެވޭ މަގެކެވެ.

އިލަންގެ މި ހުވަފެނަކީ އޭނާގެ އެހެން ކުންފުންޏެއް ކަމަށްވާ ސްޕޭސްއެކްސްގެ ސްޓާޝިޕް ރޮކެޓް މަޝްރޫއުއާ އެއްފަދަ ހުވަފެނީ މަޝްރޫއު އެކެވެ.

ސްޕޭސް އެކްސްގެ ސްޓާޝިޕް ރޮކެޓް މަޝްރޫއުއަކީ ދުނިޔޭގެ ސަތަހައިން ބޭރުވެ ޖައްވީ ދަތުރެއްގެ ތެރެއިން ދުނިޔޭގެ އެއްތަނުން އަނެއް ތަނަށް އެއް ގަޑިއިރު ތެރޭގައި ދެވޭނެ މަޝްރޫއު އެކެވެ.