ސޯޝަލް މީޑިއާ އާއްމުވެފައިވާ މިޒަމާނުގައި ކޮންޓެންޓް ކްރިއޭޝަންއަކީ ގިނަ ބަޔަކު ކުރަމުން އަންނަ ކަމެކެވެ. އެގޮތުން "މިސްޓަ ބީސްޓް"އޭ ބުނުމުން ނޭނގޭ މީހަކު މަދުވާނެ އެވެ.

މިސްޓަ ބީސްޓަކީ އޭނާގެ ސޯޝަލް މީޑިއާގެ އެކި ޕުލެޓްފޯމްތަކަށް އަޕްލޯޑްކުރާ ތަފާތު ކޮންޓެންޓްތަކާއެކު ގިނަ ބައެއްގެ މަގުބޫލުކަން ހޯދާފައިވާ ފަރާތެކެވެ.

އޭނާގެ ކޮންޓެންޓްތަކަކީ އަބަދުވެސް ވަރަށް ތަފާތު ކޮންޓެންޓްތަކެއް ކަން ގިނަ މީހުން ފާހަގަކުރެ އެވެ. އެގޮތުން މިފަހަރުވެސް އޭނާ މިވަނީ ތަފާތު ކަމެއް ކޮށްފަ އެވެ.

ހަބަރުތައް ބުނާ ގޮތުގައި ކޮންޓެންޓް ވީޑިއޯތަކެއް ޝޫޓު ކުރުމުގެ ބޭނުމުގައި މިސްޓަ ބީސްޓް ވަނީ މިސްރުގެ ގަދީމީ "ޕިރަމިޑްސް އޮފް ގިޒާ"ގެ ތިން ޕިރަމިޑްއެއް 100 ގަޑިއިރަށް ކުއްޔަށް ހިފާފަ އެވެ.

މިސްޓަ ބީސްޓްގެ މަގްސަދަކީ ދުނިޔޭގެ ހަތް އަޖާއިބުތަކުގެ ތެރޭގައި ހިމެނޭ "ޕިރަމިޑްސް އޮފް ގިޒާ"ގެ މީގެ ކުރިން ފެނިފައިނުވާ މަންޒަރުތައް އާއްމުންނަށް ގެނެސްދިނުމެވެ.

ޓިކްޓޮކް ޓީޒާއެއް މެދުވެރިކޮށް މިސްޓަ ބީސްޓް އެ ހަބަރު އާއްމުންނާ ހިއްސާކޮށްފައިވާއިރު އޭނާ ބުނެފައިވަނީ މިއީ އޭނާގެ އެންމެ އުއްމީދީ ޕްރޮޖެކްޓް ކަމަށެވެ.

މިސްޓަ ބީސްޓްގެ މި އިއުލާނާއެކު އެއްބަޔަކު އޭނާގެ ހިތްވަރަށް ސާބަސް ދެމުންދާއިރު އަނެއްބަޔަކު އަންނަނީ އޭނާއަށް ޖޯކު ވެސް ޖަހަމުންނެވެ.