ބޮލީވުޑްގެ މަޝްހޫރު ދެ ތަރިން ކަމަށްވާ ރަންވީރު ސިންގްއާއި ދީޕިކާ ޕަދުކޯންގެ ދަރިފުޅު ދުއާ ޕަދުކޯން ސިންގްގެ މޫނު ފުރަތަމަ ފަހަރަށް މީޑިއާއަށް ދައްކާލައިފި އެވެ.

މިދިޔަ ހޯމަ ދުވަހު ދުއާގެ މޫނު މީޑިއާއަށް ދައްކާލި ނަމަވެސް އެއްވެސް ފޮޓޯއެއް ނުނެގުމަށް ރަންވީރާއި ދީޕިކާ ވަނީ މީޑިއާގެ ކިބައިން އެދިފަ އެވެ.

ދުއާގެ މޫނު މީޑިއާއަށް ދައްކާލާފައިވަނީ އެކަމަށް ހާއްސަކޮށް ރަންވީރާއި ދީޕިކާގެ ގޭގައި މީޑިއާއަށް ހާއްސަކޮށްގެން ބޭއްވި ކުޑަ ހަފްލާއެއްގަ އެވެ. ދުއާގެ މޫނު ފެނުނު ނޫސްވެރިން ބުނާ ގޮތުގައި ތުއްތު ދުއާގެ މޫނަކީ ވަރަށް ލޯބި މޫނެކެވެ. އެއާއެކު އޭނާ ވައްތަރީ ދީޕިކާއާ ކަމަށްވެސް އެމީހުން ބުނެ އެވެ.

ދުއާގެ މޫނު ނުފެންނަ ގޮތަށް އެ ހަފްލާގެ ތެރެއިން ނަގާފައިވާ ފޮޓޯތައް މިހާރު މީޑިއާގައި ދައުރުވަމުން އަންނައިރު އެ ފޮޓޯތަކުން ރަންވީރާއި ދީޕިކާގެ އުފާވެރިކަން ފެނިގެންދެ އެވެ.

2018 ވަނަ އަހަރު ކައިވެނިކުރި ރަންވީރާއި ދީޕިކާއަށް އެމީހުންގެ އަލަތު ދަރިފުޅު ދުއާ ލިބިފައިވަނީ މިދިޔަ ސެޕްޓެމްބަރު މަހު އެވެ.