ކުރީގެ ސަރުކާރުން ހިންގި ގެދޮރުވެރިޔާ ސްކީމްގެ ދަށުން ފްލެޓް ދޫކުރި ގޮތާ ގުޅޭގޮތުން ކުރަމުންދާ ޖިނާއީ ތަހުގީގުގައި ތުހުމަތުވާ ކަމަށް ފާހަގަވި މީހުންނަށް ދައުވާ ކުރުމުގެ މަޝްވަރާތައް ފަށާފައިވާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފި އެވެ.

އޭސީސީން މިރޭ ބުނީ އެ މައްސަލާގައި ދައުވާ ކުރުމާ މެދު ގޮތެއް ނިންމުމަށް ޕްރޮސިކިއުޓާ ޖެނެރަލްގެ އޮފީހާއެކު ރަސްމީކޮށް މަޝްވަރާ ފެށިފައިވާ ކަމަށެވެ.

"އާންމު މަސްލަހަތު ބޮޑު މި މައްސަލައިގެ ޑިއުޓީ ޕްރޮސިކިއުޝަންގެ މަރުހަލާ ނިންމައި، ދައުވާ ކުރެވޭނެ ފަރާތްތަކުގެ މައްޗަށް ދައުވާކޮށްދިނުމަށް އެދެން ކުރަންޖެހޭ މަސައްކަތްތައް މި ކޮމިޝަނުން ވީ އެންމެ އަވަހަކަށް ކުރަމުންގެންދާނެ ވާހަކަ މައުލޫމާތަށްޓަކައި ދަންނަވަމެވެ،" އޭސީސީން ބުންޏެވެ.

އެ މައްސަލައިގެ ތަހުގީގަށް ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާއި އެ މިނިސްޓްރީގެ ކުރީގެ ސީނީއާ ޕޮލިޓިކަލް އެގްޒެކެޓިވް މުހައްމަދު އާރިފްގެ ޕާސްޕޯޓް ވަނީ ހިފަހައްޓާފަ އެވެ. އެ ދެ ބޭފުޅުން ވިދާޅުވީ ފްލެޓް ދޫކުރުމުގައި އެ މިނިސްޓްރީން ގާނޫނާ ހިލާފު އެއްވެސް ކަމެއްކޮށްފައިނުވާނެ ކަމަށެވެ.