އުމްރާގެ އަޅުކަން އަދާކުރުމަށް، ރާއްޖޭގެ އެކި ކުންފުނިތަކުގެ ހަވާލުގައި މިމަހުގެ މިހާތަނަށް 6300 އަށްވުރެ ގިނަ އުމްރާވެރިން މައްކާއަށް ގޮސްފައިވާކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިނިސްޓަރު ޝަހީމް ވިދާޅުވީ މިއަހަރު އުމްރާގެ އަޅުކަމަށް މައްކާއަށް މިހާތަނަށް 6373 އަށްވުރެ ގިނަ ދިވެހީން ގޮސްފައިވާ ކަމަށެވެ. ރާއްޖެއިން ޑިސެމްބަރު މަހުގެ އުމްރާއަށްދަނީ 4000 އެއްހާ މީހުން ކަމަށް އިސްލާމިކް މިނިސްޓްރީން ބުންޏެވެ.

ރާއްޖެއިން އުމްރާއަށް ދިޔަ އެންމެންގެ ހާލު ވެސް ރަނގަޅު ކަމަށް ޝަހީމް ވިދާޅުވި އެވެ. އުމްރާވެރިންނަށް އެންމެ ރަނގަޅު ހިދުމަތެއް ދޭ ގްރޫޕެއް ކޮންމެ އަހަރަކު ވެސް ހޮވަން އެ މިނިސްޓްރީން މިހާރު ވަނީ ނިންމާފަ އެވެ.

އުމްރާވެރިންނާ މެދު އިހުމާލުވާ ފަރާތްތަކާ މެދު ފިޔަވަޅު އަޅާނެ ކަމަށް އެ މިނިސްޓްރީން ވަނީ ބުނެފަ އެވެ. ރާއްޖެއިން މީހުން އުމްރާއަށް ގެންދިޔުމަށް 50 ގްރޫޕަކަށް ހުއްދަދީފައިވެ އެވެ.

ގްްރޫޕްތަކުގެ ހަވާލުގައި ގިނަ ބަޔަކު އުމްރާއަށް ދިޔަޔަސް އަމިއްލައަށް ވެސް ބައެއް މީހުން އުމްރާއަށް ދެ އެވެ.