މިފްކޯގެ ޑިރެކްޓަރުންގެ ބޯޑުގެ ޗެއާޕާސަންގެ މަގާމުގައި ހުންނެވި އަހުމަދު ޝަރީފް އެ މަގާމުން ވަކިކޮށް، މޯލްޑިވްސް ފިޝަރީސް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ލިމިޓެޑް (އެމްފޯމްޕީސީ) ގެ ޑިރެކްޓަރުންގެ ބޯޑުގެ ޗެއާޕާސަންގެ މަގާމަށް މިއަދު އައްޔަންކޮށްފި އެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން ބުނީ މިފްކޯގެ ޗެއާޕާސަންގެ މަގާމުން ޝަރީފް މިއަދު ވަކިކޮށް، އެމްފޯމްޕީސީގެ ޗެއާޕާސަނަކަށް އައްޔަނު ކޮށްފައިވާ ކަމަށެވެ.

މިފްކޯގެ ޗެއާޕާސަންކަމަށް ޝަރީފް އައްޔަނު ކުރީ 2023 ވަނަ އަހަރުގެ ޑިސެމްބަރު 9 ގަ އެވެ.

ރައީސް މުހައްމަދު މުއިއްޒު އެމްފޯމްޕީސީ ކުންފުނި އުފެއްދެވީ މިދިޔަ ފެބްރުއަރީ މަހު އެވެ.

އެ ކުންފުނި އުފެއްދީ ރާއްޖޭގެ މަސްވެރިކަމުގެ ސިނާއަތް އިތުރަށް ފުޅާކޮށް މުޖުތަމައުއަށް އެ ސިނާއަތުން ލިބޭ މަންފާ އިތުރު ކުރަން އެކުއާކަލްޗާ އާއި މެރިން ކަލްޗާފަދަ ވަސީލަތްތަކުން އުފައްދާ އުފެއްދުންތައް ވެސް ބޭރު ދުނިޔޭގައި އިސްތިހާރު ކުރުމަށެވެ.

މީގެ އިތުރުން ރާއްޖޭގެ މަސްވެރިކަމަށް ހާއްސަ ބްރޭންޑެއް ތައާރަފުކޮށް، ގައުމީ ބާޒާރާއި ބައިނަލްއަގުވާމީ ބާޒާރަށް ނެރުމާއި، ފެންވަރު ރަނގަޅު އަދި މަތީ އަގު ލިބޭ ތަފާތު ބާޒާރުތަކުގައި ރާއްޖޭގެ މަސްވެރިކަމުގެ އުފެއްދުންތަކަށް ހިއްސާ ހޯދުން ވެސް އެ ކުންފުނީގެ މަސްއޫލިއްޔަތުގެ ތެރޭގައި ހިމެނެ އެވެ.

މަސްވެރިކަމާއި ގުޅޭ މުޅިން އާ ކުންފުންޏެއް އުފައްދައި ޗެއާޕާސަނަކު އައްޔަން ކުރެއްވި އިރު، މަސްވެރިކަމާއި ގުޅުންހުރި އުފެއްދުންތައް ތައްޔާރުކޮށް ވިއްކުމަށް ހާސަކޮށް މީގެ 32 އަހަރު ކުރިން އުފެއްދި މިފްކޯ ހިންގަމުންދަނީ ގެއްލުމުގައިކަން ފާހަގަކޮށްލެވެ އެވެ.