ބޯ ކޮންމެ ސިނގިރޭޓަކުން އެވްރެޖް ގޮތެއްގައި ދިރިއުޅުމުގެ 20 މިނެޓު އުނިވާ ކަމަށް އިނގިރޭސި ވިލާތުގައި ދާދިފަހުން ހެދި ދިރާސާއަކުން ދައްކައިފި އެވެ.

އިނގިރޭސި ވިލާތުގައި ދުންފަތުގެ އިސްތިއުމާލުކުރާ މީހުންގެ މެދުގައި ހެދި އެ ދިރާސާއިން އެނގުނު ގޮތުގައި ބޯ ކޮންމެ ސިނގިރޭޓަކަށް ފިރިހެނެއްގެ ދިރިއުޅުމުން 17 މިނެޓު އުނިވާއިރު އަންހެނެއްގެ ދިރިއުޅުމުން 22 މިނެޓް އުނިވެ އެވެ. އެގޮތުގެ މަތިން ދުވާލަކު 20 ސިނގިރޭޓުގެ ފޮށްޓެއް ހުސްކުރާނަމަ ދުވާލެއްގެ މައްޗަށް ދިރިއުުޅުމުން ޖުމްލަ ހަތް ގަޑިއިރު އުނިވާނެ ކަމަށް ދިރާސާވެރިން ބުނެފައިވެ އެވެ.

އެ ދިރާސާގައި އިތުރަށް ފާހަގަކޮށްފައިވާ ގޮތުގައި ދުންފަތުގެ އިސްތިއުމާލުކުރާ މީހުން ގިނަ ދުވަހު ދުނިޔޭގައި ތިބެ ސިއްހަތު ގޯސްވުމަށްވުރެ ރަނގަޅު ސިއްހަތެއްގައި ހުއްޓާ މެދު އުމުރުގައި މަރުވުން ގާތެވެ.

އެއާއެކު ދުންފަތުގެ އިސްތިއުމާލު ކުރުން ހުއްޓާލުމަކީ އެ މީހެއްގެ އުމުރު ބޮޑުތަނުން ދިގުވާނެ ކަމެއް ކަމަށް ޔުނިވާސިޓީ ކޮލެޖް އޮފް ލަންޑަންއިން ހެދި އެ ދިރާސާގައި ބުނެފައިވެ އެވެ.

އެހެން ކަމުން މި ފެށުނު އާ އަހަރު ހަޔާތަށް އެއްވެސް ބަދަލެއް ގެންނަން ވިސްނާނަމަ ދުންފަތުގެ އިސްތިއުމާލު ކުރުން ހުއްޓާލުމަކީ ރަނގަޅު ކަމެއް ކަމަށް ސައިންސްވެރިން ބުނެ އެވެ.