ރާއްޖެއަށް މިހާރު ކުރަމުންދާ ވިއްސާރައިގައި ވައިގަދަވުމުގެ ސަބަބުން ވެލާނާ އިންޓަނޭޝަނަލް އެއާޕޯޓު (ވީއައިއޭ)އަށް މިއަދު ޖައްސަން އައި ބައެއް މަތިންދާބޯޓުތަކަށް ނުޖެއްސި ދަތިތަކާއި ކުރިމަތިވެއްޖެ އެވެ.

މެޓް އޮފީހުން ވަނީ ރާއްޖޭގެ ބޮޑު ސަރަހައްދަކަށް މިއަދުވެސް މޫސުން ގޯސްވާނެކަމަށް ލަފާކޮށްފަ އެވެ. އެގޮތުން ވީއައޭ ހިމެނޭ މެދުރާއްޖެތެރެއަށް ވަނީ މިއަދު މެންދުރުފަހު 3:00 އާ ހަމައަށް ރީނދޫ ސަމާލުވެސް ނެރެފަ އެވެ. އެ އިދާރާއިން ވަނީ އެ ސަރަހައްދަށް ވިލާގަނޑުގައި ގަޑިއަކު 45 މޭލަށް ވައިގަދަވާނެ ކަމަށް ވަނީ ލަފާކޮށްފަ އެވެ.

ބޭރުގެ ބޮޑެތި ބޯޓުތައް ވެސް ވަނީ ވީއައިއޭއަށް ނުޖެއްސި މަތީގައި މަޑުކުރަން ޖެހިފަ އެވެ. އެގޮތުން ފްލައި ދުބާއީއާއި ސިންގަޕޯ އެއާލައިންސްގެ އިތުރުން މޯލްޑިވިއަންއިން މާވަރުލަށް ދަތުރުކުރި ފްލައިޓަށް ވެސް ވަނީ ޖެއްސޭނެ ގޮތެއްނުވެ މަޑުކުރަން ޖެހިފަ އެވެ.

އދ. މާމިގިޔަށް ދަތުރުލުރި ފްލައިމީގެ ބޯޓެއްވެސް ވަނީ އެ އާޕޯޓަށް ނުޖެއްސި އަނބުރާ ވީއައިއޭއަށް ގޮސްފަ އެވެ.

ވައިގެ ދަތުރުފަތުރާ ގުޅޭ މައުލޫމާތު ގެނެސްދޭ އޭވިއޭޓާސް މޯލްޑިވްސް އިން ބުނާ ގޮތުގައި، ވައިގެ ބާރުމިން މިހާރު އުޅެނީ 35 ނޮޓިކަލް މޭލުގަ އެވެ. ދުރުފެންނަ މިންވަރު ނުވަތަ ވިޒިބިލިޓީ އުޅެނީ 2،000 މީޓަރުގަ އެވެ.

މިއަދަކީ ރާއްޖެއިން އުމުރާއަށް ދިޔަ ގިނަ ބަޔަކު އެނބުރި އަންނާތީ އެއާޕޯޓްގައި ބާރުބޮޑުވާނެކަމަށް އެމްއޭސީއެލްއިން ލަފާކޮށްފައިވާ ދުވަހެކެވެ. މޫސުން ގޯސްވުމުގެ ސަބަބުން ދަތުރުފަތުރު ކުރާ ގިނަބަޔަކަށް ވަނީ ދަތިތަކާއި ކުރިމަތިވެފަ އެވެ.