ބޮލީވުޑްގެ ލަވަކިޔުންތެރިޔާ އަބީޖީތު ބަޓާޗާރްޔާގެ ހޫނު ބަހުގެ ހަމަލާއެއް އަނެއްކާ ވެސް މަޝްހޫރު ތަރި ޝާހްރުކް ޚާންއަށް އަމާޒުވެއްޖެ އެވެ.

މީޑިއާއަށް ދިން އިންޓަވިއުއެއްގައި އަބީޖީތު މިފަހަރު ބުނެފައިވަނީ ޝާހްރުކް ޚާންގެ ފިލްމުތަކަށް ލަވަކިޔަން އެންމެ ރަނގަޅުވާނީ އޭނާ އަމިއްލައަށް ކަމަށެވެ.

"އޭނާގެ ލަވަތައް އަމިއްލައަށް ކިޔުން ރަނގަޅުވާނެ. ކޮންމެ ގޮތެއް ވިޔަސް މަޝްހޫރުވާ ލަވަތަކުގެ ހުރިހާ ތައުރީފެއް ލިބެނީ އޭނާއަށް" އަބީޖީތު ބުންޏެވެ.

އަބީޖީތު މި ބީދައިން ވާހަކަ ދައްކާފައި މިވަނީ އޭނާއާއި ޝާހްރުކް ޚާންއާ ދެމެދު އުފެދިފައިވާ ދެކޮޅުވެރިކަން އަލުން މީޑިއާއަށް ފެންމަތިވެފައިވާ ދަނޑިވަޅެއްގަ އެވެ.

އެގޮތުން ސަންޖޭ މިޝްރާގެ ޕޮޑްކާސްޓްގައި ވާހަކަ ދައްކަމުން އަބީޖީތު ވަނީ 2000ގެ އަހަރުތަކަށްފަހު ޝާހްރުކް ޚާން އޭނާއާ އަދިވެސް ވާހަކަ ނުދައްކާ ކަމަށް ބުނެފަ އެވެ.

އެ ދެމީހުންގެ މެދުގައި މައްސަލަ ޖެހުނީ 2000ގެ އަހަރުތަކަށްފަހު ޝާހްރުކް ޚާންއަށް ލަވަކިޔައިދިނުމުގެ ފުރުސަތު އަބީޖީތުއަށް ނުލިބުމާއި އޭގެ ކުރިން ޝާހުރުކްގެ ފިލްމުތަކަށް ކިޔައިދީފައިވާ ލަވަތަކުން އޭނާއަށް މާބޮޑު މަޝްހޫރު ކަމެއް ނުލިބުން ކަމަށް ބެލެވެ އެވެ.

މީގެ ކުރިން އަބީޖީތު ޝާހްރުކް ޚާންއަށް ކިޔައިދީފައިވާ ލަވަތަކުގެ ތެރޭގައި "ތުމްހެ ޖޮ މޭނެ ދޭކާ"، (މޭ ހޫ ނާ، 2004) އަދި "ޗާންދް ތާރޭ"، (ޔެސް ބޮސް، 1999) ހިމެނެ އެވެ.