އެމެރިކާގެ ލޮސް އެންޖެލަސްގެ އެކި ސަރަހައްދުތަކުގައި ރޯވެފައިވާ ބޮޑު އަލިފާންގަނޑު ނުނިވިގެން އުޅެނިކޮށް އެ ސަރަހައްދަށް އަލިފާނުގެ ނަގޫރޯޅިތަކެއް އަރައިފި އެވެ.

މި ހާދިސާގައި އެ ސިޓީގެ އެންމެ އަގުބޮޑު ކަމަށް ބުނެވޭ ޕެލިސޭޑްސް ސަރަހައްދުގައި ނަގޫރޯޅިއެއް އުފެދި އިތުރު ގެއްލުންތަކެއް ލިބިފައިވާ ކަމަށް ހަބަރުތައް ބުނެ އެވެ.

ރިޕޯޓުތައް ބުނާ ގޮތުގައި ނަގޫރޯޅިތައް އުފެދެން މެދުވެރިވީ އެ ސަރަހައްދުގައި ވައި ގަދަވެ ރޯވެފައިވާ އަލިފާންގަނޑު ވަޔާ އެއްވެގެންނެވެ.

https://www.youtube.com/watch?v=qIKf9XSyenU

މި އަލިފާންގަނޑުގައި މިހާތަނަށް 16 މީހަކު މަރުވެފައިވާއިރު އެތައް ހާސް ބަޔަކަށް ވަނީ އެމީހުންގެ ގެދޮރު ދޫކޮށް ރައްކާތެރި ހިސާބުތަކަށް ދާން ޖެހިފަ އެވެ.

ޖެނުއަރީ މަހުގެ 10 ވަނަ ދުވަހު ރޯވި އަލިފާންގަނޑު ތިންރޭ ތިންދުވާ ވީއިރު ވެސް ކޮންޓްރޯލް ވެފައިނުވާއިރު އެ މަސައްކަތުގައި އެތައް ހާސް ބަޔަކު އަންނަނީ ހަރަކާތްތެރި ވަމުންނެވެ.

އެހެން ނަމަވެސް ކުރިއަށް އޮތް ދުވަސްތަކުގައި ވެސް އެ ސަރަހައްދުގެ މޫސުން އިތުރަށް ގޯސްވެ އަލިފާން ނިއްވުމުގެ މަސައްކަތަށް އިތުރު ގޮންޖެހުންތައް ކުރިމަތިވާނެ ކަމަށް މާހިރުން ލަފާކުރެ އެވެ.