ލޮސް އެންޖެލަސްގައި ރޯވެފައިވާ އަލިފާންގަނޑު ނިއްވުމުގައި ހަރަކާތްތެރިވާ އޮފިޝަލުންގެ މުސާރަ ކުޑަކަމުން މަޝްހޫރު މޮޑެލް ކިމް ކާޑޭޝަން ފާޑުކިޔައިފި އެވެ.

އެގޮތުން އެ މަސައްކަތުގައި ހަރަކާތްތެރިވާ ފަޔާ ފައިޓަރުންގެ މުސާރައަކީ ގަޑިއިރަކަށް އެއް ޑޮލަރު ކަމަށް މީޑިއާ ރިޕޯޓުތަކުން ބުނެފައިވެ އެވެ.

ކިމްގެ އިންސްޓަގްރާމް ސްޓޯރީގައި އާއްމުކުރި ބަޔާނެއްގައި ބުނެފައިވަނީ އެހެން މީހުންގެ ރައްކާތެރި ކަމަށް އަމިއްލަ ނަފްސު ނުރައްކަލަށް ހުށައަޅާ މީހުންނަށް އެހާ ކުޑަ އުޖޫރައެއް ދިނުމަކީ ހިތާމަހުރި ކަމެއް ކަމަށެވެ.

"އަހަންނަށް އެނގޭ އަލިފާނުގެ ގެއްލުންތައް ކުޑަކުރަން އަމިއްލަ ނަފްސު ނުރައްކަލަށް ހުށައަޅާފައިވާ އެތައް ބައެއް. މިއީ އެމީހުންނަށް ހައްގުވާ މިންވަރެއް ނޫން" ކިމް ބުންޏެވެ.

މި ބީދައިން ކިމް ވާހަކަ ދައްކާފައި މިވަނީ އަލިފާންގަނޑު ރޯވި ފަހުން އޭނާގެ އަމިއްލަ ހެދުން ބްރޭންޑް އިޝްތިހާރު ކުރުމުން އޭނާއަށް ވެސް ފާޑު ކިޔުން އަމާޒުވެފައި ވަނިކޮށެވެ.

އެހެން ކަމުން ކިމްގެ އެ ވާހަކަތަކުގެ ބޭނުމަކީ މައުޟޫ ބަދަލުކޮށް އާއްމުންގެ ސަމާލުކަން ހޯދުން ކަމަށް ބައެއް މީހުން އަންނަނީ ބުނަމުންނެވެ.