ރާއްޖެއަށް 1000 މެޓްރިކް ޓަނުގެ ގޭސް ޝިޕްމެންޓެއް ގެނައުމަށް ބޭރުގެ ޕޭޕާ ކުންފުންޏަކަށް އެޑްވާންސްގެ ގޮތުގައި 260،000 ޑޮލަރު މޯލްޑިވް ގޭސް އިން ދީފައިވާއިރު، ގޭސް ޝިޕްމަންޓް ރާއްޖެ އައިސްފައިނުވާކަން އެނގިއްޖެ އެވެ.

"ހުރިހާ"އަށް އެނގިފައިވާގޮތުގައި ރާއްޖެއަށް ގޭސް ސަޕްލައިކޮށްދިނުމަށް އެ ކުންފުންޏަށް 13.1 މިލިއަން ރުފިޔާ ދިނުމަށް މޯލްޑިވް ގޭސް އިން ވަނީ ނިންމާފަ އެވެ. އެނގިފައިވާގޮތުގައި އެޑްވާންސްގެ ގޮތުގައި އެ އަދަދުގެ 30 ޕަސެންޓަށްވާ ފައިސާ ވަނީ ދައްކާފަ އެވެ.

މިއީ މިދިޔަ އޮގަސްޓް މަހުގެ ތެރޭގައި ހިނގި ކަމެކެވެ. އެ ދުވަސްވަރު ރާއްޖެއަށް ގޭހުގެ ދަތިކަން ދިމާވީ މިކަމުގެ ސަބަބުންނެވެ. މިހާތަނަށް ވެސް އެ ގޭސް ޝިޕްމަންޓް ރާއްޖެއަށް އައިސްފައެއްނުވެ އެވެ. އަދި އެޑްވާންސްގެ ގޮތުގައި ދިން ފައިސާ ވެސް އަނބުރާ ލިބިފައެއްނުވެ އެވެ.

މިއީ ގަސްތުގައި ހިންގާފައިވާ ޖަރީމާއެއް

"ހުރިހާ"އަށް އެނގިފައިވާގޮތުގައި އެ ކުންފުނިން ހުށަހެޅީ އެލްސީ ޓާމަށް އެކަން ކުރިއަށްގެންދިޔުމަށެވެ. މާނައަކީ ގޭސް ސަޕްލައިކޮށްދީ ނިމުމުން ފައިސާ ދެއްކުމެވެ. ނަމަވެސް މޯލްޑިވް ގޭސް އިން ނިންމީ ޓީޓީ ހަދައިގެން އެކަން ކުރިއަށްގެންދާށެވެ. ޓީޓީއަކީ އެޑްވާންސްގެ ގޮތުގައި ފައިސާދީގެން ތަކެތި ގަންނަ އުސޫލެވެ.

މޯލްޑިވް ގޭސްއަށް އެންމެ ފައިދާ ހުރިގޮތަކީ ވެސް އެލްސީ ޓާމަށް އެކަން ކުރިއަށްގެންދިޔުން ކަމަށްވާއިރު، އެހެން އެކަން ކުރެވެން އޮއްވައި އެޑްވާސްގެ ގޮތުގައި ފައިސާ ދިނުމަކީ ސުވާލު އުފެދޭ ކަމެކެވެ. އާންމުގޮތެއްގައި މިފަދަ ކަންތައްތައް ކުރަނީ ރިޝްވަތުގެ ގޮތުގައި ފައިސާ ނެގުމަށެވެ.

މިފަދަ ބޮޑު ޖަރީމާއެއް ހިންގިއިރު، އެންޓި ކޮރަޕްޝަން ކޮމިޝަނުން މި މައްސަލަ ނުބަލަ އެވެ. އަދި ރައީސް ޑރ. މުހައްމަދު މުއިއްޒަށް ވެސް މިކަން އެނގޭ ކަމަކަށް ނުވެ އެވެ. މި މައްސަލަ ބެލޭނެ އެއްވެސްގޮތެއް ނެތެވެ. މޯލްޑިވް ގޭސް އިން ދެ ލައްކައަށް ވުރެ ގިނަ ޑޮލަރު ގެއްލުނީ އެވެ.