ޣައްޒާގައި ކުރަމުންދާ ހަނގުރާމަ ހުއްޓާލުމުގެ އެއްބަސްވުމަކާއި ހަމައަށް ދިއުމަށް ތައްޔާރުވެއްޖެ ކަމަށް ފަލަސްތީނުގެ އިސް އޮފިޝަލަކާ ހަވާލާދީ ބީބީސީން ރިޕޯޓުކޮށްފި އެވެ.

މީގެ މަސްތަކެއް ކުރިން އެމެރިކާގެ ރައީސް ޖޯ ބައިޑަން ވަނީ އިޒްރޭލާއި ހަމާސްއާ ދެމެދު އެއްބަސްވުމަކަށް ތައްޔާރުވަމުން އަންނަކަމަށާއި އެމެރިކާއިން މިކަމުގައި ކުއްލި މަސައްކަތްތަކެއް ކުރަމުންދާކަމަށް ވިދާޅުވެފަ އެވެ.

އިޒްރޭލުގެ އޮފިޝަލަކު ރޮއިޓާސްއަށް ބުނެފައިވަނީ މަޝްވަރާތައް ކުރިއަށް ދާކަމަށާއި އަވަސް މުސްތަގުބަލެއްގައި އެއްބަސްވުމަކަށް އާދެވިދާނެކަމަށެވެ.

އެމެރިކާގެ ރައީސް ޖޯ ބައިޑަން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއާ އާއި މަޝްވަރާތަކުގައި މެދުވެރިއެއްގެ ގޮތުގައި ހަރަކާތްތެރިވާ ޤަޠަރުގެ ޝެއިޚް ތަމީމް ބިން ހަމަދު އަލް ޘާނީއާ ހޯމަ ދުވަހު ވާހަކަފުޅު ދައްކަވާފައިވާ ކަމަށް ރިޕޯޓްތައް ބުނެ އެވެ.

ފަލަސްޠީނު އޮފިޝަލު ވިދާޅުވީ ހަމާސްއާއި އިޒްރޭލުގެ އޮފިޝަލުން ހޯމަ ދުވަހު އެއް ޢިމާރާތެއްގައި މަޝްވަރާތައް ކުރިއަށް ގެންދިޔަކަމަށެވެ.

އެއްބަސްވުމުގެ ބައެއް ތަފްޞީލުތައް ހާމަކުރައްވަމުން އެ އޮފިޝަލު ވިދާޅުވެފައިވަނީ ތަފްޞީލީ މަޝްވަރާތަކަށް ވަރަށް ގިނަ ވަގުތު ނެގިކަމަށެވެ.

ދެފަރާތުން އެއްބަސްވެފައިވަނީ އެއްބަސްވުމުގެ ފުރަތަމަ ދުވަހު ހަމާސްއިން ތިން ރަހީނުން ދޫކޮށްލުމަށްފަހު، އިޒްރޭލުން މީހުން ދިރިއުޅޭ ސަރަހައްދުތަކުން ސިފައިން އަނބުރާ ގެންދަން ފަށާނެކަމަށެވެ.

ހަތް ދުވަސް ފަހުން، ހަމާސްއިން އިތުރު ހަތަރު ރަހީނުން ދޫކޮށްލާނެ އެވެ. އަދި އިޒްރޭލުން ދެކުނުގައި ތިބި ހިޖުރަކުރި މީހުން އުތުރަށް އެނބުރި ދިއުމަށް ހުއްދަ ދިނުމަށްވެސް އެއްބަސްވުމުގައި ހިމަނާފައިވާ ކަމަށް އެ އޮފިޝަލާއި ހަވާލާދީ ބީބީސީން ވަނީ ރިޕޯޓުކޮށްފަ އެވެ.

މި އެއްބަސްވުމުގައި ހިމެނެނީ އިޒްރޭލު ސިފައިން ފިލަޑެލްފިއާ ކޮރިޑޯގައި ދެމިތިބުމަށާއި، 42 ދުވަހުގެ ފުރަތަމަ މަރުހަލާގައި އިރުމަތީ އަދި އުތުރު ސަރަހައްދުގެ ބޯޑަރުގައި 800 މީޓަރުގެ ބަފާ ޒޯނެއް ބެހެއްޓުމަށެވެ.

އިޒްރޭލުން އެއްބަސްވެފައިވަނީ 1،000 ފަލަސްޠީނު މީހުން ޖަލު ބަންދުން ދޫކޮށްލުމަށެވެ. އޭގެ ތެރޭގައި 15 އަހަރު ނުވަތަ އެއަށްވުރެ ދިގު މުއްދަތަށް ޙުކުމް ކުރެވިފައިވާ 190 މީހުން ހިމެނެ އެވެ. މީގެ ބަދަލުގައި ހަމާސްއިން 34 ރަހީނުން ދޫކޮށްލާނެ އެވެ.

އެއްބަސްވުމުގެ ދެވަނަ އަދި ތިންވަނަ މަރުހަލާއަށް މަޝްވަރާކުރަން ފަށާނީ ހަނގުރާމަ ހުއްޓާލާތާ 16 ވަނަ ދުވަހު އެވެ.

އެއްބަސްވުމެއް ކައިރިވެފައިވާކަމުގެ ރިޕޯޓުތައް އިތުރުވަމުން ދިޔުމާއެކު، ވައިޓް ހައުސްގެ ނެޝަނަލް ސެކިއުރިޓީ އެޑްވައިޒަރު ޖޭކް ސަލިވަން ވިދާޅުވެފައިވަނީ މި ހަފްތާގައި އެއްބަސްވުމަކަށް އާދެވިދާނެ ކަމަށެވެ. އެއީ ބައިޑަންގެ ރިޔާސަތުގެ އެންމެ ފަހު ހަފްތާ އެވެ.

މީގެ އިތުރުން މިކަމާއި ގުޅިގެން ބައިޑަން މިޞްރުގެ ރައީސް ޢަބްދުލްފައްތާޙް އައްސީސީއާ ވާހަކަފުޅު ދައްކަވަން ހަމަޖެހިފައިވާ ކަމަށްވެސް އޭނާ ވިދާޅުވި އެވެ.

ޓްރަމްޕް ކުރިން އިންޒާރު ދެއްވާފައިވަނީ 20 ޖެނުއަރީގައި އޭނާ މަޤާމާ ހަވާލުވުމުގެ ކުރިން ރަހީނުން ދޫކޮށްނުލައިފިނަމަ މައްސަލަ ގޯސްވެދާނެކަމަށެވެ.

އިޒްރޭލުގެ ހާރިޖީ ވަޒީރު ގިޑިއަން ސައާ ނޫސްވެރިންނަށް ވިދާޅުވެފައިވަނީ ކުރިއެރުން ލިބިފައިވާ ކަމަށާއި އެއްބަސްވުން ކުރިއަށްވުރެ މާ ރަނގަޅު ކަމަށް ފެންނަ ކަމަށެވެ.

ނަމަވެސް ނަތަންޔާހޫގެ ސަރުކާރު ކޯލިޝަނުން ދަނީ ހަނގުރާމަ ހުއްޓާލުމާއި ދެކޮޅު ހަދަމުން ކަމަށް ރިޕޯޓްތައް ބުނެ އެވެ.

އެގޮތުން ނަތަންޔާހޫގެ ޕާޓީގެ 10 މެންބަރުން އޭނާއަށް ސިޓީއެއް ފޮނުވައި ހަނގުރާމަ ހުއްޓާލުމާ ދެކޮޅު ހަދައިފައިވެ އެވެ.

މަޝްވަރާތައް ކުރިއަށްދަނިކޮށް، ޣައްޒާގެ ސިވިލް ޑިފެންސް އެޖެންސީން ރިޕޯޓުކޮށްފައިވަނީ ހޯމަ ދުވަހު ޣައްޒާ ސިޓީއަށް އިޒްރޭލުން ދިން ވައިގެ ހަމަލާތަކުގައި 50 އަށްވުރެ ގިނަ މީހުން ޝަހީދުވެފައިވާ ކަމަށެވެ.

އިޒްރޭލާއި ހަމާސްއާ ދެމެދު މިފަހަރު ހަނގުރާމަ ފެށިފައިވަނީ 7 އޮކްޓޯބަރު 2023 ގައި ހަމާސްއިން އިޒްރޭލުގެ ދެކުނަށް ދިން ހަމަލާއާ ގުޅިގެންނެވެ. އެ ހަމަލާގައި 1،200 އެއްހާ މީހުން މަރުވެ، އިތުރު 251 މީހުން ޣައްޒާއަށް ރަހީނުންގެ ގޮތުގައި ގެންދެވުނެވެ.

މިއާއެކު އިޒްރޭލުން ހަމާސް ނައްތާލުމުގެ ނަމުގައި ޣައްޒާގައި ހަނގުރާމަ ފެށި އެވެ.

ޣައްޒާގެ ހެލްތު މިނިސްޓްރީން ބުނާ ގޮތުގައި މި ހަނގުރާމައިގައި 46،500 އަށްވުރެ ގިނަ މީހުން ޝަހީދުވެފައިވެ އެވެ.