ރާއްޖެއަށް މިއަހަރުގެ ފުރަތަމަ ދެ ހަފުތާ ތެރޭގައި 90،659 ޓޫރިސްޓުން އަތުވެއްޖެ އެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުން މި އަދަދަކީ މިދިޔަ އަހަރުގެ މި މުއްދަތުގައި ޒިޔާރަތްކުރި 83،966 ފަތުރުވެރިންނަށް ވުރެ 8 ޕަސެންޓް އިތުރު އަދަދެކެވެ.

ރާއްޖެއަށް އެވަރެޖްކޮށް ދުވާލަކު 6،476 ޓޫރިސްޓުން ޒިޔާރަތްކުރެ އެވެ.

ޓޫރިޒަމްގެ ގަދަ 10 ގައުމު

  • ރަޝިއާ - 12،920 ޓޫރިސްޓުން
  • އިޓަލީ - 10،662 ޓޫރިސްޓުން
  • އިނގިރޭސިވިލާތް - 7،698 ޓޫރިސްޓުން
  • ޗައިނާ - 6،667 ޓޫރިސްޓުން
  • ޖަރުމަނު - 5،725 ޓޫރިސްޓުން
  • އިންޑިއާ - 4،241 ޓޫރިސްޓުން
  • އެމެރިކާ - 3،028 ޓޫރިސްޓުން
  • ފްރާންސް - 2،838 ޓޫރިސްޓުން
  • ކަޒަކިސްތާން - 1،863 ޓޫރިސްޓުން
  • ރޯމޭނިއާ - 1،839 ޓޫރިސްޓުން

ރާއްޖެއަށް މިއަހަރު ޒިޔާރަތްކުރި ޓޫރިސްޓުން ތެރެއިން 63،414 ޓޫރިސްޓުން (69.9 ޕަސެންޓް) ޗުއްޓީ ހޭދަކުރީ ރިސޯޓްތަކުގަ އެވެ. މީގެ އިތުރުން ގެސްޓްހައުސްތަކުގައި 22،684 ޓޫރިސްޓުން (25 ޕަސެންޓް) ޗުއްޓީ ހޭދަކުރިއިރު 2،359 ޓޫރިސްޓުން ޗުއްޓީ ހޭދަކުރީ ހޮޓާތަކުގަ އެވެ. އަދި 2،203 ފަތުރުވެރިން ޗުއްޓީ ހޭދަކުރީ ސަފާރީތަކުގަ އެވެ.

ޓޫރިޒަމަށް މިވަގުތު ރާއްޖޭގައި 172 ރިސޯޓާއި 825 ގެސްޓްހައުސްގެ އިތުރުން 155 ސަފާރީ އަދި 15 ހޮޓާ ދަނީ ހިންގަމުންނެވެ. މި ތަންތަނުގައި ޓޫރިސްޓުންނަށް ހުރި އެނދުގެ އަދަދަކީ 61،464 އެވެ.

އެންމެ ގިނަ ޓޫރިސްޓުން ރިސޯޓުތަކަށް އައި އިރު ރާއްޖޭގެ ބެޑް ކެޕޭސިޓީގެ 69 ޕަސެންޓު ނިސްބަތްވަނީ ވެސް ރިސޯޓުތަކަށެވެ. ރާއްޖޭގައި ޓޫރިޒަމް ހިދުމަތްދޭ 61،000 އެނދު ހުރި އިރު އޭގެ ތެރެއިން 42،000 އަކީ ރިސޯޓުތަކުގައި ހުރި އެނދުގެ އަދަދެވެ.